Qazaqstannyń aviatsiialyq ákimshiligi otandyq áýekompaniialardyń ushaqtaryna azamattardyń qaýipsizdigine qaýip tóndirgendikten, Aýǵanstan áýe keńistigimen ushýǵa tyiym saldy, - dep habarlaidy "Ult aqparat".
Vedomstvo málimetinshe, Qazaqstannyń aviatsiialyq ákimshiligi otandyq áýekompaniialardyń azamattyq áýe kemeleri Aýǵanstannyń áýe keńistigin paidalaný boiynsha qaýip-qaterdi baǵalaýdy jáne táýekelderdi basqarýdy júrgizgen.
"Onyń qorytyndysy boiynsha Aýǵanstan aýmaǵyna jáne onyń áýe keńistigine ushý kezinde jolaýshylar men áýe kemeleriniń qaýipsizdigine áser etetin táýekelder men qaýipter bar degen sheshim jasalǵan. Júrgizilgen baǵalaý nátijeleri negizinde 16 tamyzda Qazaqstannyń aviatsiialyq ákimshiligi turaqty júk jáne charterlik áýetasymaldardy oryndaityn Qazaqstannyń áýekompaniialaryna biylǵy jaǵdai turaqtalǵanǵa deiin azamattyq áýe kemelerine Aýǵanstan aýmaǵyna jáne onyń áýe keńistiginnen ushýǵa tyiym salý týraly tiisti nusqaýlar jiberdi", - delingen habarlamada.
