Qazaqstandyq úsh boksshy áielder arasyndaǵy «Ulttar kýbogi» halyqaralyq týrniriniń finalyna shyqty, dep habarlaidy Olympic.kz.
Serbiiada áielder arasyndaǵy «Ulttar kýbogi» halyqaralyq básekesiniń alǵashqy finalisteri anyqtaldy. Jartylai finaldyq kezdesý nátijesi boiynsha úsh qazaqstandyq boksshy finalǵa joldama aldy. 60 kelide Rimma Volosenko jartylai finalda túrkiialyq qarsylasyn jeńip, finalǵa shyqty. Al 81 keliden joǵary salmaqta Lázzat Kúngeibaeva chehiialyq sportshydan basym tústi.
Aita keterligi, 81 kelige deiingi salmaq dárejesinde Gúlsaia Erjan jerebe nátijesi boiynsha avtomatty túrde finalist atanǵan bolatyn. 69 keli salmaq dárejesinde sharshy alańǵa shyqqan Valentina Halzova jartylai finalda túrkiialyq álem chempiony Býsenaz Sýrmenelige jol berip, jarystyń qola júldesine ie boldy.
Búgin Qazaqstan quramasynyń sportshylary, atap aitqanda, Arailym Marat, Dina Jolaman jáne Vladislava Kýhta finaldyq joldamany sarapqa salady.
