Qazaqstandyq joǵary oqý oryndary stýdentter arasynda vaktsinatsiiany qoldaý aktsiiasyn bastaidy, - dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Vedomstvo málimeti boiynsha, COVID–19-ǵa qarsy ekpe alǵan stýdentter joǵary oqý oryndarynyń múmkindikterine bailanysty oqýǵa, jataqhanalarda turýǵa jeńildikter alyp, túrli syilyqtarǵa ie bolady.
"Osylaisha, joǵary oqý oryndary halyqtyń densaýlyǵyn qorǵaý úshin vaktsinatsiialaý qarqynyn kúsheitý jónindegi jumysty qoldaidy. Tek stýdentter ǵana emes, sonymen qatar joǵary oqý oryndarynyń ekpe saldyrǵan oqytýshylary da materialdyq yntalandyrýǵa ie bolady.
Ál-Farabi atyndaǵy QazUÝ, L.N. Gýmilev atyndaǵy EUÝ, Abai atyndaǵy QazUPÝ, Q.I. Sátbaev atyndaǵy QazUTZÝ, M. Áýezov atyndaǵy OQÝ, M. Ótemisov atyndaǵy BQÝ, H. Dosmuhamedov atyndaǵy Atyraý ýniversiteti vaktsinatsiialaýdy qoldaý boiynsha aktsiialardy bastap ketti. Birqatar joǵary oqý ornynyń stýdentteri úshin oqýǵa, jataqhanalarda turýǵa jeńildikter, saýyqtyrý shipajailaryna tegin joldamalar, tegin tamaqtaný jáne qoǵamdyq kólikti paidalaný talondary qarastyrylǵan", - delingen habarlamada.
Sondai-aq, joǵary oqý oryndary vaktsina alǵan stýdentter úshin shet tilderi, kompiýterlik saýattylyq jáne kásipkerlik daǵdylardy damytatyn tegin kýrstar uiymdastyrýdy josparlap otyr. Sonymen qatar, ekpe saldyrǵan keibir ýniversitetterdiń stýdentteri fitnes zaldaryna, basseinge, teatrǵa, kinoteatrǵa jáne kontsertterge tegin bara alady.
Kórsetilgen joǵary oqý oryndarynyń oqytýshylary da nazardan tys qalmady. Vaktsinatsiialanǵan oqytýshylar qosymsha aqy nemese aqyly demalys alady.
"Joǵary oqý oryndaryn koronavirýstyń elde taralýy alańdatyp otyr. Vaktsinatsiia máseleleri men onyń sheshilý joldaryn joǵary oqý oryndarynyń ózderi qabyldaidy. Ministrdiń tapsyrmasy boiynsha joǵary oqý oryndary stýdentter men oqytýshylardy vaktsinatsiialaýǵa shaqyryp, yntalandyrý boiynsha sharalar qabyldap jatyr. Bul aktsiia bizdiń azamattardyń sanasyn oiatýǵa kómektesedi dep senemiz. Biz birlese otyryp, qaýipti virýsty jeńe alamyz jáne karantin múmkindiginshe tez aiaqtalady dep úmittenemiz. Basqa joǵary oqý oryndaryn da vaktsinatsiiany qoldaý úshin yntalandyrý sharalaryn uiymdastyrýǵa shaqyramyz. Sebebi, bul koronavirýstyń taraýyn toqtatýdyń jalǵyz joly", - dedi bilim jáne ǵylym vitse-ministri Qýanysh Erǵaliev.
Buǵan deiin Nur-Sultan men Mańǵystaý oblysynda vaktsina alǵandardyń páter utyp alý múmkindigi bar ekeni habarlanǵan bolatyn.
Keiin Almaty aýdandarynyń birinde BAÁ-ge joldama oinatylatyny aityldy. Sondai-aq, buǵan deiin vaktsina saldyrǵandar arasynda smartfondar men turmystyq tehnika oinatylǵan bolatyn.
