Parijde ótken frantsýzdyń «L'Etrange Festival» kinofestivali aiasynda rejisser Ádilhan Erjanovtyń filmografiiasy kórsetildi, dep habarlaidy "Ult aqparat" «Qazaqfilm» kinostýdiiasynyń baspasóz qyzmetine silteme jasap.
Týyndylar arasynda QR Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» kinostýdiiasynda túsirilgen «Rieltor», «Úkili kámshat» jáne «Tún qudaiy» filmderi de bar.
Rejisser Ádilhan Erjanovtyń aitýynsha, onyń filmderine frantsýz kórermeni asa qyzyǵýshylyq tanytqan. Kelýshiler sany kóp bolyp, kezekke turyp kútkender de bolǵan. Sonymen qatar, rejisser túrli kásibi kezdesýler men suhbattar ótkizgen.
«Frantsýzdar óner men kinony braziliialyqtar fýtboldy túsingendei uǵynady. Olar úshin óner - ulttyq dástúr. Sondyqtan da kinodaǵy avangard sol jaqtan taraidy. Kinodaǵy modany Kann men Frantsiia jasaidy. Ol jaqtyń kórermenimen sóilesýdiń ózi ǵanibet. Olar sinefilder - qazaq kinosynda bolyp jatqan dúnielerden habardar. Olarǵa shynymen de meniń kinom qyzyqty», - dedi Erjanov.
«L'Etrange Festival» shirek ǵasyrǵa jýyq ýaqyt ótkizilip keledi. Bul festival «erekshe, qaitalanbaityn, sirek, joǵary deńgeidegi» filmderge arnalǵan. Festival baǵdarlamasynda negizgi baiqaý (Lars fon Trierdiń «Djek turǵyzǵan úi» filmi kórsetiletin) men qysqametrajdy filmderdiń baiqaýynan bólek, konkýrstan tys baǵdarlamada japon jańa tolqynynyń filmderiniń kórsetilimi, ańyzǵa ainalǵan Nikkatsu atty japon stýdiiasynyń filmderiniń retrospektivasy, sondai-aq «Jańa talanttar», «Derekti kino» sektsiialary bar.
