Búgin jańartylǵan dúniejúzilik reitingte qazaqstandyq tennisshiler joǵary kóterildi, dep habarlaidy "Ult aqparat".
Qazaqstannyń birinshi raketkasy Elena Rybakina Áielder tennisi qaýymdastyǵynyń (WTA) reitingisinde 26-dan 25-orynǵa shyqty.
Osylaisha 20 jastaǵy tennisshi Iaroslava Shvedovanyń 2012 jylǵy jetistigin qaitalady. E.Rybakinanyń Qazaqstan rekordyn jańartýyna tolyq múmkindigi bar.
Sondai-aq Iýliia Pýtintseva 38-den 34-inshi, Zarina Diias 73-ten 63-satyǵa ornalasty.
Bul nátije osy úsh tennisshiniń jeksenbi kúni márege jetken Aýstraliia ashyq chempionatynda úshinshi ainalymǵa deiin jetkendigine bailanysty bolyp otyr.
Reitingte aýstraliialyq Eshli Barti kóshbasshylyq ornyn saqtap qalsa, rýmyniialyq Simona Halep chehiialyq Karolina Plishkovany yǵystyryp, ekinshi orynǵa kóterildi.
Juptyq synda qazaqstandyqtardan Galina Voskoboeva men Anna Danilina bes satyǵa kóterilip, sáikesinshe 56-ynshy jáne 122-orynǵa jaiǵasty. Iu.Pýtintseva 40 satyǵa (202) tómendese, E.Rybakina kerisinshe 173 saty joǵarylap, 344-raketka atandy.
Kásipqoi tennisshiler qaýymdastyǵy (ATP) da erler arasynda jańartylǵan reitingti jariia etti.
Munda Aýstraliia ashyq chempionatynyń jeńimpazy atanǵan serbiialyq Novak Djokovich kósh bastasa, ispaniialyq Rafael Nadal ekinshi orynǵa túsip qaldy. Shveitsariialyq Rodjer Federer burynǵysha úzdik úshtikte keledi.
Qazaqstandyq Aleksandr Býblik 56-dan 54-orynǵa kóterilse, Mihail Kýkýshkin 68-satyda qaldy. Dmitrii Popko 13 satyǵa joǵarylap, 170-raketka atandy.
Aýstraliia ashyq chempionatynyń jartylai finalyna deiin jetken M.Kýkýshkin men A.Býblik juptyq synda kúrt sekiris jasady. M.Kýkýshkin 74 satyǵa joǵarylap, 68-raketka atandy. Al A.Býblik birden 246 satyny artqa qaldyryp, úzdik júzdikke (96-oryn) endi.
Sondai-aq kórsetkishterin jaqsartqan Andrei Golýbev 132-inshi (+17), Aleksandr Nedovesov 146-orynda (+20) tur.
Eske sala keteiik, budan buryn Novak Djokovichtiń segizinshi márte Aýstraliia chempiony atanǵanyn jazǵan bolatynbyz.
