Ulybritaniiada qazaqstandyq sýretshi Úriia Djýrik The London Ultra art-installiatsiialar kórme-baiqaýynda bas júlde men aqshalai syilyqqa ie boldy, dep habarlaidy "Ult aqparat".
The London Ultra - zamanaýi kórkem ideialardyń toǵysatyn jeri. Munda minimalistik kompozitsiialardan bastap, sándi installiatsiia jáne tańdai qaqtyrarlyq abstraktsiiaǵa deiin bar. Sharaǵa jyl saiyn álemniń túkpir-túkpirinen óner adamdary kelip, baqtaryn synaidy. Biyl Úriianyń kórmege ekinshi ret qatysýy. Ol ádettegidei kóshpendilerge etene tanys material - maldyń tabiǵi júninen músinder jasaidy.
Sýretshiniń biylǵy installiatsiiasy tamyr men júike talshyqtaryn eske salady. Osylaisha avtor kórermenniń nazaryn adamzattyń búgingi kókeikesti máselelerine aýdartqysy keledi.
«Halyq tehnologiialyq jáne ekonomikalyq progress kóshine ilesemin dep, tabiǵatpen jáne búkil álemmen bailanysyn joǵaltyp jatyr. Tipti bir-birimizden de alshaqtap baramyz. Iaǵni, bul tehnologiialar bizdi biriktirip qana qoimaidy, sonymen birge ajyratady. Adamdar áleýmettik jelilerdegi ádemi fotosýretteriniń artyna tyǵylyp, ózderiniń jalǵyzsyrap qalǵandaryn sezbei de qalǵandai», - deidi sýretshi.
Synshylar bolsa, onyń bul eńbegine joǵary baǵa berip otyr.
«Úriianyń bul jumysy maǵan erekshe áser etti. Ol basqalarǵa múldem uqsamaidy. Keńistikti, tústerdi, tekstýrany óte sátti paidalanǵan», - dedi bizben suhbatynda art-agent Billi Orafferrti.
The London Ultra kórme-konkýrsynyń uiymdastyrýshylary álemniń júzdegen elinen kelgen qatysýshylardyń arasynan qazaqstandyq sýretshiniń eńbegin eń úzdik dep baǵalap, bas júlde jáne 1000 sterling fýntyn tabys etti. Ýriia óz jumystarynda kóshpendilerdiń ejelgi materialy - júndi paidalaný arqyly Qazaqstannyń atyn bedeldi halyqaralyq kórmelerde pash etýdi jalǵastyra bermek.
