QR Syrtqy ister ministrligi Italiiaǵa oqýǵa túsken qazaqstandyq stýdentterdiń Shengen vizasyn ala almaý sebebin túsindirdi, dep habarlaidy QazAqparat.
«1963 jylǵy «Konsýldyq qatynastar týraly» Vena konventsiiasyna sáikes, shet memleketterdiń ulttyq vizalaryn resimdeý máseleleri árbir eldiń ishki zańnamasymen retteledi jáne árbir memlekettiń airyqsha quzyreti bolyp sanalady. Ulttyq vizalardy resimdeý jónindegi qujattar osy memlekettiń quzyretti organdarymen qaralady jáne kelisiledi. Sondai-aq Shengen keńistigi memleketteriniń biryńǵai bazasy arqyly óńdeledi. Halyqaralyq tájiribege sáikes, shet memlekettiń viza berýden bas tartatyn konsýldyq mekemesi ótinish berýshige jáne úshinshi tulǵalarǵa bas tartý sebebin habarlamaýǵa da quqyly», - dedi Aibek Smadiiarov vedomstvonyń baspasóz qyzmeti alańynda ótken brifingide.
Onyń atap ótýinshe, qazirgi ýaqytta Qazaqstanda akkredittelgen birqatar sheteldik diplomatiialyq ókildik vizalardy resimdeý jáne berýdi óz elderinde COVID-19-ǵa bailanysty engizilgen karantindik is-sharalardy eskere otyryp qaraidy.
«Jalpy, Italiia Elshiliginiń konsýldyq bólimi kóshi-qon erejeleriniń qatańdatylýyn eskere otyryp, Italiianyń kóshi-qon qyzmetterimen birge stýdentterdiń 22 qujattan turatyn árbir ótinimin muqiiat tekserýge májbúr. Al bul ótinishterdi óńdeý protsesine áserin tigizedi. Osyǵan bailanysty stýdentterge viza alý úshin qujattardy erterek tapsyrý qajettigine nazar aýdaramyz.
Sonymen qatar, bul másele QR SIM basshylyǵynyń baqylaýynda ekenin habarlaimyz. Qazaqstandaǵy Italiia elshisimen jáne konsýlymen tiisti kezdesýler ótkizildi. Olardyń aqparaty boiynsha, viza berýdi keshiktirýdiń negizgi sebebi sońǵy ailarda kelip túsken ótinishter sanynyń artýy bolyp otyr. Ai saiyn konsýldyq bólim 3 myńǵa jýyq vizany óńdeidi jáne beredi. Italiialyq diplomattar bul máseleni sheship, viza rásimdeitin qyzmetkerler sanyn 2 esege kóbeittik dep sendirdi», - dedi ol.
