Clockster HR protsesterin avtomattandyrý júiesin ázirleitin qazaqstandyq startap bet-kelbetti anyqtaý, dene temperatýrasy men betperdeniń bolýyn baqylaý boiynsha jańa sheshim oilap tapty, dep habarlaidy "Ult aqparat" Astana Hub halyqaralyq tehnoparkine silteme jasap.
Clockster kompaniiasynyń negizin qalaýshy jáne startap jetekshisi Erjan Rysqalievtyń aitýynsha, joba toby arnaiy qurylǵyǵa tapsyrys berdi, ony engizý serviske kelýshilerdiń temperatýrasyn jáne betperdeniń bolýyn anyqtaýǵa múmkindik beredi.
«Jańa sheshim uiym qyzmetkerleriniń dene qyzýyn, betperdeniń bar-joǵyn avtomatty túrde anyqtaidy. Joǵary temperatýra bolǵan jaǵdaida - derekter avtomatty túrde bazada saqtalady jáne jaýapty tulǵalarǵa elektrondy mekenjai boiynsha habar jiberiledi. Sondai-aq, dene qyzýy bar adamǵa ǵimaratqa ótýge tyiym salýǵa bolady, ondaǵy júie qyzmetkerdi týrniket arqyly ótkizbeidi. Bul betperdelerge de qatysty», - deidi E. Rysqaliev.
Qazirgi ýaqytta jańa júie Astana Hub halyqaralyq tehnoparkinde ornatylǵan jáne basqa kompaniialardan 10-ǵa jýyq aldyn ala tapsyrys túsken.
«Bul servis koronavirýstyq infektsiianyń taralý qaýpin azaitý úshin qurylys sektory, aýrýhanalar, meditsinalyq mekemeler, mektepter, ýniversitetter úshin óte qolaily. Qazir kóptegen kompaniialarda kelýshilerdiń temperatýrasyn kúzetshiler tekserýde. Munda adam faktory kóp. Kúzetshi kei temperatýrany baiqamaýy múmkin jáne arzan qurylǵylar da jalpy bir gradýsqa deiin qatelik jiberedi. Iaǵni, adamda 37 gradýs temperatýra kórsetkishi bolsa, ony 36 gradýs dep kórsetýi múmkin. Sonymen qatar, bizdiń qyzmetimizde kelýshilerdiń temperatýrasyn qolmen jazýdyń qajeti joq. Bizde barlyǵy tsifrlanǵan jáne avtomattandyrylǵan, qonaqtardyń kirý/shyǵý jazbalaryn kórýge bolady», -deidi startap jetekshisi.
Qazirgi ýaqytta startap Qazaqstanmen ǵana shektelmei, Resei, Ýkraina jáne Filippin naryǵyna da shyqty.
Aita keteiik, Clockster – Astana Hub IT-startaptar halyqaralyq tehnoparkiniń qatysýshysy. Tehnoparktiń barlyq qatysýshylary salyq jeńildikterin alady. Bul jeńildikter qatysýshylardy KTS, QQS, taýar importtaýdaǵy QQS, roialti salyǵy, JTS jáne derbes rezidentterdiń áleýmettik salyǵynan bosatady. Osyndai memlekettik qoldaý sharasy IT-kompaniialarǵa óz jobalaryn damytýǵa, únemdelgen qarajatty qaita investitsiialaýǵa múmkindik beredi.
«Jeńildikterdiń arqasynda biz tek qyzmetkerler úshin zeinetaqy aýdarymdaryn tóleimiz. Bul – óte úlken kómek. Ótken jyly biz kóp qarajat únemdedik. Únemdegen qarajatty jobany damytýǵa investitsiialadyq, qyzmetkerlerdiń jalaqysyn kóterdik»,-dep qorytyndylady Erjan Rysqaliev.
