Sergei Tkachenko shańǵymen tuǵyrdan sekirýden jasóspirimder arasyndaǵy álem chempionatynda qola medal jeńip aldy. Bul – atalǵan sport túrindegi Qazaqstannyń tyrnaqaldy jeńisi.
Birinshi raýndtan soń 19 jastaǵy jerlesimiz 96,5 metrdi "ushyp", birinshi orynda turdy. Al finaldyq básekede Sergei 94,5 metrge deiin sekirip, 248,9 upaimen úzdik úshtikti tuiyqtady, dep habarlady Ulttyq olimpiadalyq komitettiń saity.
Altyn júlde 252,1 upai jinaǵan norvegiialyq Tomas Markengtiń, kúmis júlde germaniialyq Lýka Rottyń enshisinde. Finalda nemis sportshysy 97,5 metrge sekirgenimen, Markengtiń alǵashqy ainalymda jiǵan upaiy kómekke keldi.
Qazaqstan komandasynyń bas bapkeri Pavel Vasilevtiń aitýynsha, bul tarihi jeńiske para-par júlde.
"Táýelsiz Qazaqstan tarihynda tuńǵysh ret biz jasóspirimder arasyndaǵy álem chempionatynan júlde alyp otyrmyz. Árine, bul biz úshin úlken jetistik. Jarysqa Nikita Deviatkin, Gleb Safonov, Nurshat Tursynjanovtar da qatysty. Biyl biz alǵash ret kvotalar sanyn kóbeitip, qatysýshy sportshylar sanyn tórtke jetkizdik. Buryn bizdiń el atynan eki sportshydan artyq qatyspaityn. Sondai-aq, biz alǵash ret komandalyq týrnirde baq synaimyz. Álem boiynsha 12 komanda ǵana qatysatyn týrnirdiń finalyna óttik. Bul da tarihta birinshi ret bolyp otyrǵan jaǵdai", — dep atap ótti bas bapker.
"Qazirgi qýanyshymda shek joq. Elimizdiń bairaǵyn álemdik synda kótergenim úshin erekshe baqyttymyn", — deidi Sergei Tkachenko.
