Paraolimpiada sportshysy qazaqstandyq Áliia Raeva qoǵamnyń damýyna qosqan úlesi jáne jetistikteri úshin German Gmainer syilyǵyn alýǵa daýys berýdiń aqtyq kezeńine ótti, dep habarlaidy "Ult aqparat".
Jetim balalarǵa arnalǵan otbasylyq úlgidegi SOS-balalar aýyly ulttyq keńsesinen málim etkendei, jeńimpaz daýys sanyna qarai anyqtalady. Áliia qazir ekinshi orynda, biraq oǵan myna silteme arqyly daýys berip, alǵa shyǵýyna kómektesýge bolady.
«Áliia Almatydaǵy SOS-balalar aýylynda ósken. Oǵan dúniege kelgen kezde balalar sal aýrýy diagnozy qoiylǵan, osyǵan bailanysty ol jastaiynda birneshe aýyr ota jasatty. Dárigerler qyzdyń júre almaitynyn aitqan. Biraq, jaqyndarynyń qoldaýy men óziniń erik-jigeriniń arqasynda bul diagnozdy jeńip shyqty. Áliia aiaqqa turyp, tolyqtai bilim aldy, súiiktisin kezdestirip, otbasyn qurdy. Qazir jumys istep jatyr, alǵa jańa maqsattar qoiǵan. Ol qazir qoǵamdyq uiymda jumys isteýde, basqa adamdarǵa qol ushyn sozyp júr. Áliianyń bastan ótkergen oqiǵasy German Gmainer syilyǵyn uiymdastyrýshylaryn tańǵaldardy. Ol álemniń túkpir-túkpirinen qatysqan 200 úmitkerdiń arasynan finalǵa shyqty. Daýys berý 23 shildege deiin jalǵasady. Eger Áliia jeńiske jetse, bul syilyq tarihyndaǵy Qazaqstan men TMD ókiliniń alǵashqy jeńisi bolmaq», - dedi qordan.
Aita ketsek, German Gmainer syilyǵy SOS balalar aýyldarynda ósip, qandai da bir salada: sport, shyǵarmashylyq, kásibi qyzmette jetistikke qol jetkizgen adamdarǵa beriledi. Syilyq eki jylda bir ret eki jeńimpazǵa – eń kóp daýys jinaǵan er adamǵa jáne áielge beriledi. SOS balalar aýyldary – jetim balalar men ata-anasynyń qamqorlyǵynsyz qalǵan balalardy uzaq merzim boiy tárbieleitin otbasylyq model.
Alǵashqy SOS balalar aýylyn 1949 jyly Imst qalasynda (Aýstriia) aýstriialyq pedagog German Gmainer qurdy. Búginde SOS balalar aýyldary álemniń 136 elinde bar. Qazaqstanda SOS balalar aýyldary 1994 jyldan bastap Almaty, Nur-Sultan jáne Temirtaý qalalarynda jumys isteidi.
