QR Prezidenti janyndaǵy Qazaqstan strategiialyq zertteý institýtynyń bas sarapshysy Bolat Áýelbaev AQSh Memlekettik hatshysy Maik Pompeonyń Qazaqstanǵa saparmen kelýine qatysty pikir bildirdi, dep habarlaidy QazAqparat tilshisi.
«AQSh Memlekettik hatshysy Maik Pompeonyń Qazaqstanǵa qańtar aiynda jumys saparymen keletini byltyr tamyz aiynda Nur-Sultan qalasynda ótken jabyq otyrysta aityldy. AQSh pen Irak arasyndaǵy jaǵdaiǵa bailanysty josparlanǵan ýaqytta kele almady. Ol jumys saparymen Ýkrainada, Belarýsta bolyp, Qazaqstanǵa keldi. Endi S5+1 formaty aiasynda ótetin ministrler kezdesýine qatysý úshin Tashkentke bardy. Onyń osynda kelýi AQSh-ta sailaýaldy baǵdarlama júrgizilip jatqan kezben tuspa-tus keldi. Qazan aiynda AQSh-ta prezident sailaýy ótedi. AQSh Memlekettik hatshysy syrtqy saiasatqa jaýap beretin adam retinde Donald Tramptyń basqarýyn nasihattaityn bolady. Osy rette, AQSh Ortalyq Aziiany, Aýǵanstandy nazardan tys qaldyrmaityndaryn aityp, jahandyq saiasatqa basymdyq beredi», - deidi Bolat Áýelbaev.
Onyń aitýynsha, Maik Pompeo Qazaqstanǵa kelgen kezde Qytai men Qazaqstan qarym-qatynasy, aýylsharýashylyq jáne basqa da máselelerdi kótergen.
«Munyń bári AQSh Memleket hatshysynyń Qazaqstanǵa kelýiniń janama sebepteri ǵana. Jaqyn arada Donald Tramp Ortalyq Aziiaǵa qatysty strategiiasyn jariialaityn bolady. Al ázirge Ortalyq Aziia memleketterimen strategiialyq bailanysty saqtap qalý, ony keńeitý qanshalyqty mańyzdy ekeni aitylady (Tashkentte – avt)», - deidi bas sarapshy.
