Qazaqstandyq olimpiadashylardyń taǵy bir toby Almatydan Tokioǵa ushyp bardy. Delegatsiia quramynda 44 adam bar, onyń ishinde 23 sportshy, jattyqtyrýshylar, kúrdeli ǵylymi toptardyń mamandary men ákimshilik qyzmetkerleri dep habarlaidy Olympic.kz.
Sportshylar qatarynda erkin jáne áielder kúresi, ártistik júzý, kórkem gimnastika men júzý, bessaiys pen jeńil atletika sportynyń ókilderi kelgen.
«Aman-esen ushyp keldik. Olimpiada aýylyndaǵy qazaqstandyq sportshylar qataryna qosylǵansha asyqtyq. Daiyndyq pen sportshylardyń qalpyna kelýine ýaqyt jetedi dep oilaimyn. Bizdiń atletter Olimpiada oiyndaryna qarqyndy daiyndalyp, erekshe jigerlenip keldi», - deidi Giýzel Maniýrova.
Japoniiaǵa kelgen soń sportshylar men jattyqtyrýshylar karantin aimaǵynda boldy. Odan keiin charterlik reispen Tokioǵa jetti.
Jeńil atletika boiynsha básekeler 30 shildede bastalady. Áielder 100 metr qashyqtyq pen úsh qarǵyp sekirý boiynsha baq synaidy. Jarys jolyna Olga Rypakova da shyǵady. Ol qazirgi tańda Tokioda jattyǵyp jatyr.
Sondai-aq, Olga Safronova, Mariia Ovchinnikova, Irina Ektova da baq synaidy. Erler arasynda 400 metr qashyqtyq boiynsha Mihail Litvin 1 tamyzda jarysqa qosylady. 1 tamyzdan bastap Elmira Syzdyqova bastaǵan burymdy balýandar men grek-rim kúresiniń sheberi Meirambek Ainaǵulov beldesedi.
2 tamyzda ártistik júzýden Aleksandra men Ekaterina Nemichter, 5 tamyzda qazirgi bessaiys boiynsha Elena Potapenko men Pavel Iliashenko, 6 tamyzda kórkem gimnastikadan Alina Ádilhanova óner kórsetedi.
28 shildedegi nátije boiynsha Qazaqstan quramasynyń qorjynynda Olimpiada oiyndarynan úsh qola medal bar. Ony dziýdoshy Eldos Smetov men aýyr atletter Zýlfiia Chinshanlo men Igor Son utyp aldy.
