Foto: ©️ Tengrinews.kz / Turar Qazanǵapov
Elimizdegi mektepterde birinshi toqsan aiaqtalýǵa jaqyn. Kúzgi demalys 30-qazan men 5-qarashany qosa alǵanda jeti kúnge sozylady, dep habarlaidy "Ult aqparat" Oqý-aǵartý ministrliginiń baspasóz qyzmetine silteme jasap.
Ministrlik oqýshylardyń kúzgi demalystaǵy bos ýaqytyn tiimdi ótkizý jáne jeke tulǵalyq qasietterin damytý úshin Birtutas tárbie baǵdarlamasy aiasynda tómendegi is-sharalar josparyn usynady:
- joǵary synyp oqýshylarymen jáne olardyń ata-analarymen birlesip ǵylymi joba jumystarynyń mazmuny boiynsha aqparattyq-tanymdyq sabaqtar, JOO-nyń oqytýshylarymen kezdesýler uiymdastyrý, ǵylymi jobalar týraly suhbattar ótkizý;
- «Balalar kitaphanasy» jobasyn iske asyrý aiasynda oqyrmandarmen kezdesý uiymdastyrý jáne oqylǵan ádebietterdi talqylaý;
- «Otbasylyq dástúrler» taqyrybynda ata-analar jinalysyn ótkizý, «Pedagog-bala-ata-ana» birlesýimen otbasylyq dástúrler týraly áńgime júrgizý;
- Qoja Ahmet Iassaýidiń týǵanyna 930 jyl tolýyna orai «Qoja Ahmet Iassaýi muralaryn oqý» taqyrybynda oqýshylar arasynda esse men jobalyq jumystar jazý;
- oqýshylar arasynda «Ónegeli ómir» taqyrybynda esse jazýdan baiqaý ótkizý, balalardyń úzdik jumystaryn atap ótý;
- oqýshylarmen jáne olardyń ata-analarymen birlesip «Densaýlyq saqtaýdyń 6 sharty – taza aýa, durys tamaqtaný, qozǵalys, tynysh uiqy, jaqsy kóńil-kúi, kúizeliske túspeý» taqyrybynda salaýatty ómir saltyn qalyptastyrý boiynsha is-sharalar ótkizý;
- «Ákege izet, anaǵa qurmet» taqyrybynda «Jas aqyndar aitysy» baiqaýyn uiymdastyrý, jeńimpazdaryn marapattaý engizildi.
Aita keteiik, bul is-sharalar bilim berý uiymdaryna ádistemelik usynym retinde jiberiledi.
