Qazaqstandyq oqýshylar halyqaralyq IchO 2020 himiia olimpiadasynda tórt qola medal jeńip aldy. Bul týraly "Ult aqparat" «Daryn» ortalyǵyna silteme jasap habarlaidy.
Halyqaralyq himiia olimpiadasy (IChO 2020) qashyqtyq formatynda ótti. Oǵan álemniń 62-den astam elinen 248 oqýshy qatysty. Olimpiadaǵa Qazaqstannan irikteý kezeńderiniń jalpy reitingisinde jáne Mendeleev olimpiadasynyń nátijeleri boiynsha ulttyq quramanyń músheleri bolǵan tórt úmitker qatysty.
Halyqaralyq himiia olimpiadasy - 20 jasqa deiingiler qatysatyn jyl saiyn ótetin himiia boiynsha saiys. Halyqaralyq himiia olimpiadasyna qatysqan jyldar ishinde, dálirek aitsaq 1999 - 2019 jyldar aralyǵynda Qazaqstan Respýblikasynyń ulttyq quramasy 72 marapatqa ie boldy: 6 altyn, 27 kúmis, 37 qola medal jáne 2 qurmet gramotasy.
«Biyl onlain rejimde ótken Halyqaralyq himiia olimpiadasynda ulttyq quramanyń barlyq músheleri qola medalmen marapattaldy. Olar: Qaiyrbek Qaidar - Pavlodardaǵy himiia-biologiia baǵytyndaǵy Nazarbaev Ziiatkerlik mektebiniń oqýshysy, Mýjýbaev Ábilmansur - Nur-Sultan qalasyndaǵy himiia-biologiialyq baǵytyndaǵy «Nazarbaev ziiatkerlik mektebiniń» oqýshysy, Seisenqul Baqdáýlet - Nur-Sultan qalasynyń daryndy jasóspirimderge arnalǵan «Bilim-innovatsiia» mektep-internatynyń oqýshysy, Abdýgafarova Kibriianýr - Almaty qalasyndaǵy Halyqaralyq «Galaxy» mektebiniń oqýshysy», - delingen habarlamada.
Qatysýshylarǵa úiden shyqpai-aq IChO 2020-ǵa qatysyp, álemniń eń úzdik jas himikteriniń arasynda baqtaryn synap kórýdiń keremet múmkindigi boldy.
