Qazaqstan qurama komandasy 37-shi Balqan matematika olimpiadasyna (Balkan mathematical olympiad) qatysty. Biyl pandemiia jaǵdaiyna bailanysty olimpiada 31 qazan-5 qarasha aralyǵynda qashyqtan ótkizildi, dep habarlaidy "Ult aqparat".
Bul jarysta álemniń 18 elinen 154 oqýshy baq synaǵan. Biyl olimpiadany Rýmyniia eli uiymdastyrdy.
Balkan matematika olimpiadasy - Eýropa elderiniń oqýshylaryna arnalǵan halyqaralyq matematikalyq jarys. Qazaqstan olimpiadaǵa qonaq el retinde qatysty.
Olimpiadaǵa qatysqan ulttyq qurama komanda 6 qatysýshydan turdy. Olar - 2019 jylǵy respýblikalyq olimpiadanyń jeńimpazdary men júldegerleri, sonymen qatar olimpiadalyq rezerv músheleri.
Biyl qurama komandanyń kórsetken nátijesi óte joǵary boldy. 37-shi Balqan matematika olimpiadasynyń qorytyndysy boiynsha ulttyq qurama eki kúmis jáne tórt qola medaldi jeńip aldy.
Kúmis medal iegerleri: Asylbek Oljabaev jáne Tair Satýbaldin, Almaty qalasy fizika-matematika baǵytyndaǵy Nazarbaev ziiatkerlik mektebiniń 12 jáne 11 synyp oqýshylary.
Qola medal iegerleri: Tamirlan Bektemisov, Almaty qalasy fizika-matematika baǵytyndaǵy Nazarbaev ziiatkerlik mektebiniń 11-synyp oqýshysy; Batyrhan Sákenov, Almaty qalasy respýblikalyq fizika-matematika mektebiniń 10-synyp oqýshysy; Iýrii Ten, Almaty qalasy Haileybury mektebiniń 11-synyp oqýshysy; Sam Fetýllah, Nur-Sultan qalasy daryndy balalarǵa arnalǵan «Bilim – Innovatsiia» litsei-internatynyń 11-synyp oqýshysy.
