Qazaqstandyq mýzykant Imanbek Zeikenovtyń SAINt JHN atty ánshiniń Roses ánine jazylǵan remiksi Grammy syilyǵyna usynyldy, dep habarlaidy "Ult aqparat".
Grammy nominanttarynyń tizimi syilyqtyń resmi saitynda jariialandy. Odan bólek, Imanbektiń ózi de Instagram storisinde osy qýanyshty jańalyqty bólisti.
Aita keteiik, atalǵan remiksimen álemdik mýzyka charttarynda qara úzip alǵa shyqqan Imanbek Zeikenov ata-anasymen birge Aqsý qalasynda turady. Ákesi - órt sóndirýshi, anasy týristik agenttikte jumys isteidi.
Óziniń aitýynsha, ol án árleýdi jergilikti didjeiler men prodiýserlerden jáne Youtube jelisindegi videosabaqtan úirengen.
Ótken jyldyń jeltoqsanyna deiin ol jergilikti temir jol stansasynda jumys istedi. 2019 jyldyń jazynda Imanbek Saint Jhn atty reperdiń Roses atty ánin taýyp, soǵan remiks jazýdy qolǵa alady.
Bul kompozitsiia úsh jyl buryn shyǵyp qoiǵan bolatyn. Imanbek ánge remiks jazyp, ony áleýmettik jelige jariialady. Arada birneshe ai ótkende ol pop juldyzǵa ainaldy. Tipti, Amerikanyń The New York Times gazetinde Imanbek jaily maqala da jariialandy.
Grammy — AQSh Ulttyq óner jáne dybys jazý akademiiasynyń jyl saiyn tabystalatyn syilyǵy. Júldeger akademiia belsendi músheleriniń daýys berý nátijesi arqyly anyqtalady.
