Qazaqstandyq «Muzbalaq» kartinasy eki birdei kinofestivalde oljaly boldy, dep habarlaidy "Ult aqparat".
«Qazaqfilm» kinostýdiiasy shyǵarǵan «Muzbalaq» tolyqmetrajdy animatsiialyq filmi dúniejúzi kórermenderiniń júregin jaýlap jatyr.
«Kúni keshe «Muzbalaq» birden eki festivalde – Stokgolmdaǵy kino jáne teledidar festivalinde (Shvetsiia) jáne «Altyn ara» balalar filmderiniń halyqaralyq kinofestivalinde (Úndistan, Niý-Deli) «Úzdik animatsiialyq film» atalymynda top jardy. Shyǵarmashylyq topty osy jetistigimen quttyqtaimyz jáne kóptegen jańa jeńister tileimiz» dep jazdy «Qazaqfilm» kinostýdiiasy Facebook paraqshasynda.
Aita keteiik, «Muzbalaq» animatsiialyq filmi 2018 jyly túsirilgen. Rejisseri - Turdybek Maidan, Tilek Tóleýǵazy. Stsenarii avtorlary - Erbol Boranshy, Turdybek Maidan, Tilek Tóleýǵazy, Adai Ábilda.
Erte zamanda qara nietti Shegirdiń kesirinen jer astyndaǵy ábjylan oianyp, jer betine shyǵady. Ábjylan qazaq aýylyn otqa orap, qarsy kelgendi jalmap, el ishine úrei týǵyzady.
Sol sátte balapanyna qaýip tóngenin sezgen ana búrkit ábjylanmen aiqasyp, ony jer astyndaǵy mekenine qýyp tyǵady. Al búrkit otqa oranǵan uiadan balapanyn alyp, alysqa ushyp ketedi.
Adam jutyp dánikken ábjylan kún tutylǵanda alyp aidaharǵa ainalyp jer betine shyǵatynyn bilgen aýyl adamdary aidahardy tek qyran búrkit qana jeńe alatynyn túsinip, izdeýge attanady. Muzbalaqty Aqtai men Shegir izdep tabady.
Biraq toǵyshar Shegir men aqyldy, aq júrek Aqtai arasynda qyrandy baptaý týraly eki túrli kózqaras týyndaidy. Muzbalaqtyń jan dúniesin túsinip, tilin tapqan Aqtai Muzbalaqqa erkindik syilap, onymen adal dos bolýǵa serttesedi.
