Informatika pániniń muǵalimi Qýanysh Maǵaýin Apple kompaniiasynyń Swift baǵdarlamalaý tili boiynsha sertifikattalǵan oqytýshysy atandy, dep habarlaidy Oqý-aǵartý ministrliginiń baspasóz qyzmeti.
Nur-Sultan qalasyndaǵy Respýblikalyq fizika-matematika mektebiniń pedagogi Qýanysh Maǵaýin Apple kýrstarynan ótip, emtihandardy sátti tapsyrdy jáne ol qazaqstandyq muǵalimder arasynda alǵash bolyp sertifikat aldy. Qýanysh Germaniia, Irlandiia, BAÁ, Mysyr, Úndistan jáne basqa da elderdiń pedagogterimen birge oqydy. Oqytýshylarǵa arnalǵan «Apple Certified Trainer» kýrstaryn Apple kompaniiasy jyl saiyn ótkizedi.
Endi informatika pániniń muǵalimi álemniń úzdik ázirleýshileri bilim salasyndaǵy jańa jobalaryn tanystyratyn Apple Education ekskliýzivti is-sharalaryna qatysa alady.
«Búgingi tańda Qazaqstanda IT-indýstriia, sonyń ishinde bilim berý salasynda da qarqyndy damyp keledi. Biz elektrondy oqýlyqtar men kúndelikter qoldanatyn, sondai-aq emtihandar men olimpiadalardy onlain formatta ótkizetin sanaýly elderdiń qataryndamyz. Apple kýrstarynda Swift baǵdarlamalaý tili arqyly mobildi qosymshalardy ázirleýdiń negizderin úirendik. Tálimgerler dáristi aǵylshyn tilinde ótkizdi. Meniń tobymda negizinen qosymshalardy ázirleýde mol tájiribesi bar IT-mamandar oqydy. Al men toptaǵy jalǵyz muǵalim boldym. Barlyq emtihandy tapsyryp, Apple oqytýshysy mártebesin alǵanyma qýanyshtymyn. Aldaǵy ýaqytta mektepte oqýshylarǵa arnalǵan mobildi qosymshalar ázirleý boiynsha kýrstar ótkizip, áriptesterimmen alǵan tájiribemmen bólisýdi josparlap otyrmyn», – deidi informatika pániniń muǵalimi Qýanysh Maǵaýin.
Pedagogtiń arqasynda Apple Authorized Training Center for Education (AATCE) mártebesi ózi jumys isteitin mektepke de avtomatty túrde berildi. Endi ol jumys isteitin elordadaǵy Respýblikalyq fizika-matematika mektebi Swift qosymshasyn jasaý boiynsha kýrstar ótkizip, oqýshylardy sertifikattap, oqý ornynda Apple classroom zerthanasyn asha alady.
