Energetika ministri Maǵzum Myrzaǵaliev Qazaqstannyń munai óńdeý zaýyttary basshylarynyń qatysýymen kóshpeli keńes ótkizdi, dep habarlaidy "Ult aqparat" vedomstvonyń baspasóz qyzmetine silteme jasap.
Kezdesý barysynda Energetika ministrliginiń basshysy aǵymdaǵy jyly otandyq kásiporyndar ishki naryqty dizel jáne avia-otynmen qamtamasyz etý boiynsha mindetti oryndai almaǵanyn atap ótti. Ministrdiń sózinshe, júieli sipattaǵy problemanyń negizgi sebepteriniń biri jóndeý jumystaryn tiimsiz josparlaý bolyp tabylady.
«Óndiristik qýatty jańǵyrtýǵa qaramastan, zaýyttar eń qolaisyz sátte únemi jóndeýge toqtap turady. Ósip kele jatqan tutyný jaǵdaiynda jyl saiynǵy 25 kúndik toqtaý ruqsat etilmeitin jaǵdai bolyp tabylady. Jóndeý jumystaryn júrgizýdiń qoldanystaǵy reglamenti eskirgen dep esepteimin. Kúrdeli jóndeýge jylyna bir ǵana zaýyt toqtaýy tiis. «QazMunaiGaz» basshylyǵyna aldaǵy 5 jylǵa jańa jospar ázirleýdi tapsyramyn», - dedi Maǵzum Myrzaǵaliev.
Sondai-aq Ministrge Pavlodar munai-himiia zaýytynda jóndeý júrgizý kezinde gidrotazartý kompressory rotorynyń aqaýlyǵy anyqtalǵany týraly baiandaldy. Bul rette aqaýly bólshekti tek 5 aidan keiin ǵana aýystyrýǵa bolady jáne osy kezeń ishinde PMHZ ai saiyn josparlanǵannan 20-40 myń tonnaǵa az dizel otynyn óndiretin bolady.
Osyǵan bailanysty vedomstvo basshysy QMG basshylyǵyna MÓZ-ben birlesip kóktemgi egin jumystary bastalǵanǵa deiin, onyń ishinde munai óniminiń importy esebinen qorlar qalyptastyrýdy tapsyrdy. Sonymen qatar, ministr qysqy dizel otynyn óndirýge baǵyttalǵan «Ertis» jobasyn ýaqytyly iske asyrýdy qamtamasyz etýge basa nazar aýdardy.
«PMHZ-nyń turaqsyz jumysy ishki naryqty qamtamasyz etýge teris áser etedi. Bul, árine, balansqa áser etedi. Biz kóktemgi egin jumystaryna jinalǵan qaldyqtarsyz qalýymyz múmkin», - dedi Energetika ministrliginiń basshysy.
Sondai-aq, Ministr bir apta ishinde kompressordyń buzylý sebepterin tekserýdi aiaqtaýdy tapsyrdy jáne QMG basshylyǵyna zaýyttyń bas direktory Ospanbek Álseiitovke qatań sógis jariialaýdy usyndy.
«QazMunaiGaz» AQ-ynyń derekteri boiynsha 2017 jyly júrgizilgen barlyq úsh MÓZ-di jańǵyrtý ishki naryqty munai ónimderimen tolyq qamtamasyz etýge múmkindik beredi. Máselen, elimizde 4,96 mln.tonna avtobenzin, 5,14 mln. tonna dizel otyny jáne 623 myń aviaotyn óndiriledi.
Alaida, dizelmen bailanysty jaǵdaiǵa baǵany jasandy tejeý áser etti, dep habarlady Ulttyq kompaniia.
«3-4 toqsanda dizel otynynyń tapshylyǵy eldiń jekelegen óńirlerinde óte joǵary tutyný men aǵyndardan týyndady. Sebep - QR men kórshi elder arasyndaǵy bólshek saýda baǵalarynyń disparitetinde», - dedi Basqarma tóraǵasynyń orynbasary Daniiar Tiesov.
Sondai-aq QMG derekteri boiynsha kóbinese josyqsyz munai bazalary qaldyqtar boiynsha durys emes derekter beredi, olar munai ónimderin kóleńkeli shyǵarýdy júzege asyrady jáne munai ónimderin basqa ónimdermen aralastyrady.
Pármendi sharalar retinde ulttyq kompaniia «Munai ónimderiniń ainalymy týraly» Zańǵa senimdi derekter alý úshin áýejailardyń barlyq munai bazalary men otyn-quiý keshenderin esepke alýdyń baqylaý quraldarymen mindetti jaraqtandyrý jónindegi talapty engizýdi usynady. Sondai-aq, QMG iri AJQS jelilerin eki aptaǵa jetetin munai ónimderiniń tómendetilmeitin qorlary bolýyn mindetteýdi suraidy.
Ministr qazirgi ýaqytta el Prezidentiniń tapsyrmasy boiynsha munai ónimderi naryǵyn turaqtandyrýǵa baǵyttalǵan sharalar paketi ázirlenip jatqanyn atap ótti. Barlyq usynystar, onyń ishinde baǵany retteý máselesi múddeli memlekettik organdarmen birlesip qaralatyn bolady.
