© Photo : Anel Sytdykova / Facebook
Oral qalasynyń týmasy Ánel Sytdyqova 5 tamyzda Kaliforniiadaǵy Santa-Katalina araly men Rancho Palos Verdes qalasynyń jaǵalaýy arasyndaǵy buǵazdy júzip ótti. Ánel 34 kilometrdi eńserý úshin 19 saǵat 18 minýt jumsady jáne ol osy qashyqtyqty toqtaýsyz júzip ótti.
Jýrnalisterge bergen suhbatynda Ánel júzý qiyn ári kútpegen jaitqa toly bolǵanyn aitty, dep habarlaidy Sputnik Qazaqstan agenttigi "Moi gorod" portalyna silteme berip.
"Men tezirek júzýdi josparlaǵanmyn, biraq qiyndyqtarǵa tap boldym. Kúshti aǵystar, tolqyndar, qarsy jel boldy. Jarys qarsańynda kóp júzgenime qaramastan, azdap qobaljydym. Bul buǵazda akýlalar bar. Men jarys kúni olarmen betpe-bet kezdesemin be dep qoryqtym", - deidi ol.
Júzý jarysy saǵat 23:00-de bastalyp, Ánel 19 saǵattyń jeteýinde qarańǵyda júzgen. Osy ýaqyt boiy ony baqylaýshylar qadaǵalap otyrdy.
Marafon sharttaryna sáikes qaiyqqa qol tigizýge bolmaidy, júzý kezinde tek shomylýǵa arnalǵan arnaiy kiim, bas kiim jáne kózildirik kiiýge bolady. Ár jarty saǵat saiyn suiyq taǵamdy jeýge ruqsat etildi. Ánelge mundai taǵamdy onyń janynda eskekti qaiyqpen júzip otyrǵan dostary berip otyrdy.
"Ánel segiz jyl boiy marafon júzýimen ainalysady. 30 jasynda balalarynyń júzý boiynsha nusqaýshylary oǵan jattyǵýǵa qatysýdy usynǵan. Qazir ony reseilik maman Sergei Lenivkin jattyqtyryp júr. Ol onlain rejimde tapsyrmalar jiberip, shákirtimen birge júzý ádis-tásilderin talqylaidy. Ánel kún saiyn 2-3 saǵatyn sýda júzýge arnaidy", - dep jazady portal.
Jýrnalisterge bergen suhbatynda Ánel úi sharýasyn jumys, analyq mindetter jáne hobbimen úilestirý ońai emes ekenin aitty. Óitkeni ol kúieýiniń biznes-jobasyndaǵy jumys pen tigin, toqyma jáne aspazdyq boiynsha súiikti isin qatar alyp júrýge tyrysady.
"Men tipti keshke emin-erkin teledidar kóre almaimyn, sebebi ýaqytym tym tyǵyz", - deidi Ánel.
Áneldiń úsh uly bar.
Qazir qazaqstandyq marafonshy otbasymen birge Angliiada turady jáne ol Japoniia men Jańa Zelandiiaǵa barýdy josparlap otyr. Ol óz saiahatyn júzýmen ushtastyryp, demalýdy kózdep otyr.
