QR IIM Tótenshe jaǵdailar komiteti tótenshe jaǵdai jáne karantin kezeńinde atqaryp jatqan jumysy jaiynda aityp berdi, dep habarlaidy "Ult aqparat".
«Tótenshe jaǵdai jáne karantin kezeńinde eldiń búkil óńirinde qulaqtandyrý júiesi iske qosylyp, kún saiyn jergilikti jáne respýblikalyq telearnalardy tosqaýyldaý arqyly halyqqa SMS-habarlandyrý júrgizilýde. El turǵyndaryn tótenshe jaǵdai engizilgendigi jáne karantin jariialanǵandyǵy týraly habarlandyrý úshin respýblikalyq jáne oblystyq teleradioarnalarda 1717 ret tosqaýyldaý uiymdastyryldy. «Darmen» qosymshasy jáne «112» biryńǵai nómiri arqyly qalaǵa kirý jáne shyǵý jabylǵandyǵy, karantin jariialanǵandyǵy, qaýyrt jeli jáne Egov memlekettik qyzmetter boiynsha telefon nómirleri týraly 288 SMS-habarlama jiberildi», - dep atap ótedi komitetten.
Vedomstvo málimetinshe, órt sóndirý qyzmeti tehnikalarynyń kómegimen Aqtóbe, Qaraǵandy, Túrkistan jáne Nur-Sultan qalalarynda kóshelerdi zalalsyzdandyrý jumystary júrgizildi. Bul jumystarǵa jeke quramnyń 240 mamany men 70 tehnikasy jumyldyryldy. Olar osy ýaqytqa deiin shamamen 8 mln sharshy metr aýmaqty zalasyzdandyryp shyqty. TJK Kókshetaý tehnikalyq institýtynyń 20 qyzmetkeri de qala kóshelerin jáne adamdar kóp jinalatyn nysandar alańyn zalalsyzdandyrý jumystaryna kómektesip júr.
QR IIM TJK Respýblikalyq jedel qutqarý otriadynyń qutqarýshylary Almaty qalasy Naýryzbai aýdandyq ákimdiginiń jáne «Nur Otan» partiiasynyń aýdandyq filialynyń qoldaýymen «Biz birgemiz!» respýblikalyq aktsiiasyna qatysyp, muqtaj adamdarǵa 100 myńnan astam maska taratty.
