Qazaqstandyq kinorejisser Arman Baimuratovtyń jumystary Qytai elindegi qysqametrajdy filmderdiń VIII Aziia festivalinde (Asia Microfilm Art Festival) kórsetiledi, dep habarlaidy "Ult aqparat".
Kinorejisser Arman Baimuratovtyń «Ózgeris», «Uiyqtaǵanda» («Vo sne») jáne «Tyǵyryq» («Týpik») filmderi bul kúnderi Qytaidyń ońtústik-batysyndaǵy Iýnnan provintsiiasynyń Lintsan qalasynda ótip jatqan qysqametrajdy filmderdiń VIII Aziia festivaline (Asia Microfilm Art Festival) qatysý úshin tańdaldy. Bul týyndylar Shanhai yntymaqtastyq uiymyna (ShYU) qatysýshy elderdiń qysqa metr baǵdarlamasynda qatysýǵa ótinim berildi.
Arman Baimuratov 1972 jyly Shyǵys Qazaqstan oblysynda dúniege keldi. Ol T.Júrgenov atyndaǵy Ulttyq óner akademiiasy (teatrlyq kórkem sýret) men «Turan» ýniversitetin (rejissýra) mamandyǵy boiynsha bitirgen. 1999 jyldan beri túrli kórkemdik kórmelerge qatysyp keledi. Sońǵy ýaqytta qysqametrajdy filmder túsirip júr.
Lintsandaǵy qysqametrajdy kino Aziia festivaliniń tarihy 2013 jyldan bastaý alady. Qysqa ýaqyt ishinde sýbaimaqtyq festival álemniń 30 elinen 21 myńnan astam ótinim jinaǵan.
Festival uiymdastyrýshylarynyń aitýynsha, koronavirýs pandemiiasyna qatysty engizilgen shekteýge bailanysty biylǵy marapattaý rásiminiń formaty ózgertilip, sondai-aq shaqyrylǵan qonaqtar sany 1300-den 600 adamǵa deiin, al kórermender sany 15 myńnan 1 myń adamǵa deiin qysqartylǵan.
Eske sala ketsek, qarashanyń 6-8 kúnderi aralyǵynda Qytaidyń ońtústik-batysyndaǵy Iýnnan provintsiiasynyń Lintsan qalasynda qysqametrajdy filmderdiń VIII Aziia festivali (Asia Microfilm Art Festival) ótip jatyr.
Eske sala keteiik, jaqynda qazaqstandyq kinorejisser jáne stsenariishi Farhat Sháripovtiń «18 kilogerts» filmi Varshavadaǵy 36-shy halyqaralyq kinofestivaldiń gran-pri júldesine ie boldy.
