Biyl Qazaqstannyń kinoindýstriiasy úshin jemisti jyl boldy. Búgin QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiiasynyń kezekti otyrysynda QR Prezidenti Ákimshiligi Ishki saiasat bóliminiń meńgerýshisi, «Jahandaǵy zamanaýi qazaqstandyq mádeniet» jobasynyń jetekshisi Aida Balaeva osylai aitty, dep habarlaidy QazAqparat.
«Teatr men kino árdaiym qazaqstandyq mádeniettiń mańyzdy aspektileri bolyp tabylady. Sondyqtan túrli formattaǵy sharalar keshenin uiymdastyrdyq. Olardyń ishinde qazaqstandyq opera jáne balet trýppalarynyń belsendi gastroldik qyzmeti de bar. «Astana opera», Abai atyndaǵy opera jáne balet teatry, «Astana balet» jáne basqa da ujymdar Eýropa men Aziia elderiniń kórermenderin ulttyq opera qoiylymdarymen tanystyryp júr», - dedi Aida Balaeva jumys tobynyń otyrysynda.
Onyń aitýynsha, 2018 jyly Qazaqstan halyqaralyq arenadaǵy túrli kinofestivalderge belsene qatysty. «Biyl Mádeniet jáne sport ministrliginiń qoldaýymen 71-shi Kann kinofestivalinde Qazaqstan pavilony ashyldy. Onda «Eýraziia» halyqaralyq kinofestivaliniń tanystyrylymy ótti, sondai-aq birqatar qazaqstandyq filmderdiń treilerleri kórsetildi. Jyl basynan beri «Qazaqfilm» AQ 18 filmi 14 halyqaralyq kinofestivalge qatysyp, 11 júlde jeńip aldy», - dedi bólim meńgerýshisi.
Ol «Anaǵa aparar jol» filminiń Niý-Iorktegi WeLink Halyqaralyq kinofestivalinde «Úzdik kórkem film» júldesin ielengenin de eske saldy.
Mádeniet ministrliginiń tapsyrysymen jáne metsenattardyń qoldaýymen túsirilgen «Ámire» filmi Silver screen film (Silver skrin film) marapatyn alǵan.
Sonymen qatar, bul týyndy Gollivýdtaǵy kinofestivaldiń aqtyq synyna shyqqan.
«Qazaqstandyq kino kúnderi de jaqsy nátije berýde. Biyl qazaqstandyq kino kúnderi Italiiada, Estoniiada jáne ózge de elderde uiymdastyryldy», - dedi «Jahandaǵy zamanaýi qazaqstandyq mádeniet» jobasynyń jetekshisi A.Balaeva.
