Qazaqstandyq qajy Mekkede jol apatyna ushyrady, dárigerler oǵan kómek kórsetti, dep habarlady Qazaqstan musylmandarynyń dini basqarmasy.
"Bir adam jol apatyna ushyrady. Ol der kezinde aýrýhanaǵa jetkizilip, dárigerler miyna jeńil-jelpi zaqym kelgenin, dene jaraqatyn alǵanyn aitty. Qazir emdelip jatyr", - delingen QMDB habarlamasynda.
Biyl Qazaqstannan Mekkege 3 200 qajy attandy. Olarǵa 21 meditsinalyq maman qyzmet kórsetip jatyr. Osy ýaqyt ishinde 1 744 qajy dárigerlerdiń kómegine júgingen, dep atap ótti dini basqarma.
"Biyl Mekke qalasynda kún aptap ystyq. Ári adam kóp. Taýly óńir bolǵandyqtan, kei adamdardyń qan qysymy kóteriledi. Kei qonaqúiler Qaǵbadan alysta ornalasqan. Qajylar uzaq jol jaiaý júrýge májbúr, sol sebepti densaýlyqtary syr beredi. Mysaly, Mina jazyǵynan shaitandy taspen urý rásimi ótetin jerge deiingi qashyqtyq – úsh kilometr. Qarttarǵa ońai emes. Sýyq sý ishkennen kópshiliginiń tamaǵy isip ketken. Biz kómektesip jatyrmyz", - deidi dáriger Birjan Dosmaiylov.
Shamamen 1 150 qajyǵa tumaý tigen. Kei qazaqstandyqtardyń ishi aýyryp, qimyl-qozǵalysy qiyndap, qan qysymy kóterilipti. Bir adam soqyrishek bolyp, aýrýhanaǵa túsken eken.
"Qazir qajylardyń jaǵdaiy qanaǵattandyrarlyq. Mamandar men dári-dármek jetkilikti", - dedi dáriger.
Aita ketsek, qajylyq "qasietti jerge barýdy niet etý" degendi bildiredi. Onyń sharty boiynsha ihramǵa kirý, Kaǵbany jeti ainalyp táý etý, Safa men Márýa arasynda saǵii jasaý, Arafada turý, Muzdalifada túneý, shaitanǵa tas atý siiaqty amaldardy oryndaý kerek.
