Qazaqstandyq fýtbol klýbtary biylǵy eýrokýbok jarystaryna qatysý úshin sertifikat aldy, dep habarlaidy "Ult aqparat" Qazaqstan fýtbol federatsiiasyna silteme jasap.
Federatsiiada UEFA Chempiondar ligasy men Eýropa ligasynyń qazaqstandyq qatysýshylaryn sertifikatsiiadan ótkizý komissiiasynyń otyrysy ótti. Otyrys onlain-konferentsiia túrinde uiymdastyryldy. Onda eýropalyq jarystarǵa qatysatyn qazaqstandyq komandalardyń UEFA-nyń sertifikatsiia jáne qarjylyq Fair Rlay erejesin oryndaýy eskerildi. Nátijesinde komissiia Nur-Sultan qalasynyń «Astana» fýtbol klýbynyń UEFA Chempiondar ligasyna, «Qairat» (Almaty), «Ordabasy» (Shymkent) jáne «Qaisar» (Qyzylorda) fýtbol klýbtaryna UEFA Eýropa ligasy 2020-2021 maýsymyna qatysýǵa sertifikattar berý týraly sheshim qabyldady.
«Aita keterligi, «Astana» fýtbol klýby Nur-Sultan qalasyndaǵy «Astana Arena» stadionyn qalpyna keltirýdi 15 shildege deiin aiaqtaýy qajet. Sondai-aq, stadionnyń jasandy jamylǵysyn FIFA akkreditatsiiasy bar zerthanadan synaqtan ótkizýi tiis. Al «Qaisar» Qyzylorda qalasyndaǵy Ǵani Muratbaev atyndaǵy stadionynyń jasandy jamylǵysyn FIFA akkreditatsiiasy bar zerthanasynda jasalǵan synaq qorytyndysyn 1 tamyzyna deiin tapsyrýy kerek. Eýropalyq jarystarǵa qatysatyn komandalardyń fýtbol alańdaryn synaqtan ótkizý jyl saiyn qarastyrylǵan» dep jazylǵan federatsiia taratqan habarlamada.
Biyl Chempiondar ligasy men Eýropa ligasy irikteý satysyndaǵy oiyndardy ótkizý jospary naqtylandy. Eýrokýbok oiyndarynyń irikteý satysy bir kezdesýden turady. Ol jerebe boiynsha anyqtalady. Chempiondar ligasynyń alǵashqy irikteý satysy 8-11 tamyz aralyǵynda bolsa, Eýropa ligasynda ol 20 tamyzda ótkiziledi.
