Qazaqstan aýmaǵynda jumys isteitin uialy bailanys operatorlary meditsina qyzmetkerlerin tegin bailanyspen qamtamasyz etýde, dep habarlaidy "Ult aqparat" QR Densaýlyq saqtaý ministrligine silteme jasap.
«QR Densaýlyq saqtaý ministrligi taǵy 6 000 meditsinalyq qyzmetkerdiń tegin bailanys pen internet alatynyn habarlaidy. Olardyń árqaisysyna Qazaqstannyń kez kelgen nómirine qońyraý shalý úshin 1000 minýt jáne 100 GB internet-trafik beriledi.
QR Densaýlyq saqtaý ministrligi dárigerler men meditsinalyq qyzmetkerlerdi qosymsha qoldaý sharalaryn qabyldaýda. Uialy bailanys operatorlarynyń áleýmettik jaýapkershiligi arqasynda el aýmaǵynda jumys isteitin barlyq uialy bailanys operatorlary mobildi bailanys pen internetti qamtamasyz etedi», - dep habarlady ministrliktiń baspasóz qyzmeti.
Eske sala ketsek, Qazaqstanda qazir koronavirýs infektsiiasyn juqtyrǵandar sany 49 adamǵa jetti. Almatyda – 22 adam, Qaraǵandy qalasynda - 2 adam, Nur-Sultanda - 25 adam tirkelgen.
