Foto: instagram/sportbasqarmasy_kst
Sporttyq gimnastikadan sport sheberi, daryndy sportshy Aian Moldaǵaliev 22 jasynda qaitys boldy, - dep habarlaidy Tengrinews.kz.
Qostanai oblysynyń sport basqarmasy málimetinshe, jas sportshy 6 maýsymda qaitys bolǵan. Qaiǵyly oqiǵanyń sebepteri týraly aqparat joq.
"Ókinishke qarai, 22 jasynda sporttyq gimnastikadan Qazaqstan Respýblikasynyń sport sheberi Aian Moldaǵaliev ómirden ozdy. Ol sporttyq mansabynda eleýli tabystarǵa jetip, tanymal sportshy boldy.
Onyń bedeldi is-sharalarǵa qatysýy, tamasha sporttyq sheberligi men gimnastikany tolyq meńgergenin kórsetedi. Onyń talanty, eńbekqorlyǵy men sportqa degen adaldyǵy Qazaqstannyń kórkem gimnastika tarihynda óshpes iz qaldyrdy.
Onyń kútpegen jerden qaitys bolýy búkil sport qoǵamdastyǵy úshin aýyr qaza jáne jaqyndarynyń, dostarynyń jáne jankúierleriniń júreginde aýyr ókinish qaldyrdy.
Onyń esimi men jetistikteri sportqa shyn berilgendiginiń úlgisi retinde sportshyny syilaǵan jáne qurmettegen halyqtyń máńgilik júreginde saqtalady", - dep habarlady basqarma.
Aian sporttyq mansabyn 2007 jyly bastap, keiin Qazaqstannyń birneshe dúrkin chempiony atandy.
Aian 2018 jyly Indoneziiada ótken jasóspirimder arasyndaǵy Aziia chempionatynda qola júldeger atansa, Argentinada ótken jasóspirimder arasyndaǵy Olimpiada oiyndarynda altynshy orynǵa ie boldy.
"Men nashar óner kórsettim. Muny qoiylym deýge bolmaidy. Qarapaiym tásilde qulap qaldym. Men kishkene asyqtym. Ókinishti árine. Kóńil-kúiim jaqsy edi. Men jai ǵana qobaljydym.
Ádette bizde biliktilik bar. Kelesi apta nemese kúnara finaldar birden bastalady. Al munda eki-úsh kún. Bul tym kóp. Endi gimnastikalyq qossyryqta final ótedi. Barlyǵyn taza oryndaýǵa tyrysamyz. Meniń súiikti quralym - at pen qossyryq", - dedi Aian Argentinadaǵy olimpiada da kórsetken óneri týraly.
2019 jyly Moldaǵaliev álem kýbogynyń finalyna shyǵyp, úzdik bestikke endi.
"Aian jaqsy jumys jasady. Ol bárin jasady. Biraq áli de baza jetkiliksiz. Degenmen, onyń qoiylymyna kóńilimiz toldy", - dedi ulttyq quramanyń bas bapkeri Aleksandr Kim Olympic.kz saityna.
22 jastaǵy Aian Moldaǵaliev gimnastikadan Qazaqstan ulttyq quramasynyń múshesi bolǵan.
