Qazaqstandyq boksshy Áli Ahmedov (15-0, 11KO) Gennadii Golovkin (39-1-1, 35KO) - Sergei Derevianchenko (13-1, 10KO) boks keshiniń anderkartynda óner kórsetetinin resmi málimdedi. Bul týraly VKontakte áleýmettik jelisinde «Qazaqstannyń kásipqoi boksy» paraqshasynda jazyldy, dep habarlaidy "Ult aqparat".
«Madison Square Garden-niń ataqty ringine oralýǵa jáne Gennadii Golovkinniń boks keshine qatysatynyma qýanyshtymyn! #GGGPromotions 5 qazan kúni Niý-Iorkte kezdesemiz!», - dep jazdy Á.Ahmedov Instagram-da.
Eske salaiyq, Ahmedov - G.Golovkin qurǵan GGG Promotions kompaniiasynyń boksshysy. Ol buǵan deiingi jekpe-jegin de Madison Square Garden-de Gennadiidiń boks keshiniń aiasynda ótkizgen bolatyn. Ahmedov amerikalyq Markýs MakDenieldi nokaýtqa túsirip, ekinshi orta salmaqtaǵy WBC International Silver titýlyn ielendi.
Golovkin men ýkrainalyq Derevianchenkonyń kezdesýi 5 qazan kúni Niý-Iorktiń Madison Square Garden arenasynda ótedi. Olar IBF nusqasy boiynsha orta salmaqta bos turǵan álem chempiony titýlyna talasady. Jekpe-jek DAZN platformasynan taratylady. Aita keteiik, Golovkin naýryz aiynda DAZN-men alty aiqasty qamtityn kelisimshart jasasqan edi. Qazaqstandyq boksshy olardy úsh jyldyń kóleminde ótkizýi tiis. GGG-diń seriktestik úshin gonorary 100 mln dollardan astam somaǵa baǵalanady.
