Qazaqstandyq áieldiń balasy Kaliningrad qalasyndaǵy ákesinen qaitaryldy, dep habarlaidy "Ult aqparat".
Bul týraly QR Syrtqy ister ministrliginiń resmi ókili Aibek Smadiiarov aptalyq brifingte málimdedi.
«Ótken jyly QR azamaty Dana Ámeeva óz ulyn RF Kaliningrad qalasyndaǵy ákesinen qaitara almap edi. Osy demalys kúnderi bizdiń diplomattardyń kómegimen ata-analar kelisimge keldi. Qazir bala anasynyń qasynda Almatyda. Olar keshe ushyp keldi. Bizdiń Sankt-Peterbýrgtegi konsýlymyz Kaliningrad qalasyna jeke ózi alyp bardy jáne balanyń anasyna tapsyrylýyn qadaǵalady», - dedi Aibek Smadiiarov.
Eske sala ketsek, ótken jyly qazaqstandyq áiel Dana Ámeeva balasyn qaitarý boiynsha QR Syrtqy ister ministrliginen kómek suraǵan edi. Kezinde ol Resei azamatyna turmysqa shyǵyp, Kaliningrad qalasyna kóshken. Otbasylyq sebeptermen eki jyldan keiin ajyrasqan jáne Kaliningrad qalasynyń soty balany anasymen qaldyrý týraly sheshim shyǵarǵan. Alaida, balanyń ákesi sot sheshimin oryndamai, Belarýs pen ózge de Eýropa qalalary arqyly sábidi alyp ketken.
