Qazaqstandyq aýyratlet Denis Ulanov 2016 jylǵy Rio-de-Janeiro Olimpiadasynda qola medal alǵany úshin áli kúnge deiin syiaqy almaǵanyn málimdedi, - dep habarlaidy Tengrinews.kz agenttigi.
Denis Ulanov 2016 jyly Rio-de-Janeiroda (Braziliia) ótken Olimpiada oiyndarynda aýyr atletikadan 85 kelige deiingi salmaq dárejesinde tórtinshi bolǵan. Sportshy julqi kóterýde 175 kelini, serpe kóterýde 215 kelini (barlyǵy 390 keli) baǵyndyryp, Gabriel Synkreianmen teń túsken. Alaida onyń qarsylasy jeńilirek bolǵandyqtan Olimpiadanyń qola júldegeri atanǵan, al Ulanov 4 oryndy ielendi.
Alaida, keiin Gabriel Synkreian doping qoldanǵany úshin diskvalifikatsiialandy jáne qola medal Ulanovqa resmi túrde berilgen. 2018 jyldyń qarashasynda Ashhabadta ótken álem chempionatynda Halyqaralyq aýyr atletika federatsiiasynyń IWF prezidenti Tamash Aian kópten kútken júldeni Ulanovqa tapsyrǵan.
"Olimpiadadan keiin, shamamen bir apta ótken soń qarsylasym ustalǵanyn bildim (dopingpen. - eskertý). Olar maǵan júldeni qaida alǵym keletinin surap, Ashhabadtaǵy álem chempionatyn usyndy. Biraq ol 2018 jyly bolatyn. Sodan beri jalǵasyp keledi. Men qalǵan somany tóleý úshin 2017 jyly Mádeniet jáne sport ministrligine júgindim. Biraq maǵan ondai zań joq dedi, men aldymen tórtinshi boldym, keiin úshinshi", - deidi Denis Ulanov.
Sportshynyń advokaty Daniiar Kimanov júlde qoryn qaita qaraýǵa bolady dep esepteidi.
"Tórtinshi oryn úshin, zań boiynsha oǵan 30 myń dollar tólendi, al úshinshi orynǵa 75 myń dollar tólenýi kerek. Teńgege shaqqanda. Vedomstvo úkimettiń 2014 jylǵy 19 jeltoqsandaǵy №1345 qaýlysyna silteme jasap otyr. Ol 2020 jyldyń naýryzynda jaramsyz boldy. Ol joǵary sporttyq nátije kezinde aqshalai yntalandyrý tóleminiń mólsherin qaita qaraý múmkindigin qarastyrmaidy. Alaida úkimettiń 2020 jylǵy 27 naýryzdaǵy №153 qaýlysynda Dúniejúzilik dopingke qarsy uiymnyń (...) sheshimi negizinde joǵary sporttyq nátije berilse, chempiondarǵa aqshalai yntalandyrý tóleminiń mólsheri qarastyrylǵan jáne halyqaralyq sport jarystarynyń júldegerleri qaita qaralady", - dep túsindirdi Qimanov.
Onyń aitýynsha, memleket Denis Ulanovqa taǵy 45 myń dollar qaryz.
Mádeniet jáne sport ministrligi Tengrinews.kz tilshisiniń suraýy boiynsha departament Denis Ulanovtyń ótinishin qarady dep jaýap berdi.
"Memlekettik qoldaý maqsatynda 2019 jyldyń jeltoqsanynda dene shynyqtyrý jáne sport týraly zań qabyldandy, onda halyqaralyq jarystardyń chempiondary men júldegerleri jáne olardyń bapkerine aqshalai yntalandyrý tóleminiń mólsherin qaita qaraý kózdeledi. Denis Ulanov nazardan tys qalmady, sebebi Deniske bul ataq 2018 jyly berildi, al biz bul zańdy 2019 jyly qabyldadyq. Kóbinese normativtik quqyqtyq aktiler kúshine engenge deiin paida bolǵan qatynastarǵa qoldanylmaidy. Biraq, bul máseleniń mańyzdylyǵyn eskere otyryp, Denis Ulanovtyń ókiliniń ótinishi tolyǵyraq qarastyrylady jáne ministrlik vedomstvoaralyq komissiia qurý týraly usynys shyǵarady. Biz sheshim nátijeleri týraly qosymsha habarlaimyz", - dep sendirdi Sport jáne dene shynyqtyrý komitetiniń basshysy Serik Sápiev.
Buǵan deiin Qazaqstannyń Ulttyq Olimpiada komitetiniń (UOK) bas hatshysy Andrei Kriýkov Tokiodaǵy Olimpiada oiyndary qorytyndysyna qatysty pikir bildirip, qazaqstandyq sportshylar nátijesin qaita qaraýdy joqqa shyǵarmaitynyn aitqan bolatyn.
