Foto ashyq derekkózden alyndy
Astana qalasynyń aýdanaralyq sotyna Qazaqstannyń ár óńirinen 11 ata-ana Oqý-aǵartý ministrligine qatysty talap-aryz joldady. Bul týraly ata-analardyń múddesin qorǵaityn belgili advokat Jangeldi Súleimanov málimdep, qazaqstandyq ata-analardyń nege qol jetkizgisi keletinin aitty, - dep habarlaidy Massaget.kz portaly.
Oqýshylar byltyrǵy oqý jylyn ádettegidei 25 mamyrda emes, 31 mamyrda aiaqtady. Mektep mundai jańashyldyqqa daiyn bolmaǵandyqtan, bul ózgeris kóptegen ata-ananyń narazylyǵyn týdyrdy. Al biyl 1 qyrkúiek qarsańynda sońǵy qońyraý burynǵy kúnge qaitarylatyny jariialandy. Alaida, Súleimanovtyń aitýynsha, másele áli sheshilmegen.
"2022 jyly eks-ministr Ashat Aimaǵambetov "memlekettik jalpyǵa mindetti bilim berý standarttaryn bekitý týraly" buiryqqa qol qoidy. Qujat boiynsha oqý jyly burynǵydai 34 aptadan 36 aptaǵa deiin ulǵaidy. Bizdiń suraitynymyz óte qarapaiym nárse - oqý jylyn uzartý týraly sheshimdi joiý", - dep túsindirdi advokat.
Jangeldi Súleimanovtyń aitýynsha, sotqa júgingen ata-analar bilim berý salasyndaǵy júieli zańbuzýshylyqtar týraly 50 betten turatyn ulttyq baiandama jasap, Prezident ákimshiligine joldaǵan. Olar qujatta bilim sapasy tómen ekeni, mektepterde oqýshylar kóp ekeni, jýynatyn bólmeler bolmaýy siiaqty 29 zańbuzýshylyqty kórsetken. Dál osyndai zańbuzýshylyqtar Oqý-aǵartý ministrligine qatysty sot isinde kórsetilgen.
"Osy zańbuzýshylyqtardy joimaiynsha, oqý merzimin uzartýdyń qajeti joq dep esepteimiz", - dedi zańger.
Aita keteiik, biyl sońǵy qońyraý alǵash ret 1 maýsymda soǵyldy. Oqý jyly 1 qyrkúiekte bastalyp, 31 mamyrda aiaqtalyp, barlyǵy 36 aptaǵa sozyldy.
