Qazaqstandyq áskeri dárigerler Livanda zardap shekkenderdi emdep jatyr, dep habarlaidy "Ult aqparat".
QR Qorǵanys ministrliginiń málimetine sáikes, dárigerler Beirýt, Boýar, Mashgar jáne Saida qalalarynyń meditsinalyq mekemelerinde naýqastarǵa kómek kórsetýde.
Alǵashqy jumys kúninen bastap Qazaqstannyń áskeri dárigerleri Livannyń júzdegen azamatyna meditsinalyq kómek kórsetken. Olar Livan dárigerlerimen birge áskeri gospital jáne mýnitsipaldyq aýrýhanalardyń bazasynda jumys atqarýda.
Ministrlik aqparatynsha, naýqastardyń arasynda ammiak selitrasynyń detonatsiiasynan bolǵan jarylys tolqynynan zardap shekkender bar.
«Qazaqstandyq dárigerler hirýrgiialyq, travmatologiialyq jáne terapevtik patsientterdi emdeýge jumyldyryldy. Bizdiń dárigerler reanimatsiia jáne anesteziologiia bólimsheleriniń jumysyna, endoprotezdeý siiaqty joǵary tehnologiialyq qyzmetterdi qosa alǵanda, operatsiialar júrgizýge belsendi qatysady. Sonymen qatar, áskeri dárigerler ambýlatoriialyq naýqastarǵa kómek kórsetý jáne qabyldaý boiynsha meditsinalyq pýnktiń jumysyn uiymdastyrýda», - delingen QR Qorǵanys ministrliginiń málimetinde.
Qazaqstandyq dárigerlerdiń jumysy eldegi epidemiialyq jaǵdaidy eskere kele, qatań sanitarlyq-gigienalyq talaptardy saqtai otyryp uiymdastyrylǵan.
«Men Livannyń ońtústigindegi Beirýtta turamyn. Osy qiyn-qystaý kezeńde Qazaqstan basshylyǵyna jáne áskeri dárigerlerge meniń halqyma jáne balalaryma kómek kórsetkeni úshin alǵysymdy bildirgim keledi. Livanǵa qosh keldińiz!», - dedi naýqastardyń biri Fadi Ehri.
Esterińizge sala keteiik, qazirgi ýaqytta Livanda arnaiy maqsattaǵy qazaqstandyq áskeri-meditsinalyq jasaq jumys jasaýda.
