13 aqpan kúni elimizdiń «FORTE TRIO» memlekettik triosy Eýropa mádenietiniń ortalyǵy bolyp sanalatyn ataqty Berlin filarmoniiasynda kontsert ótkizedi. Bul týraly QazAqparat Qazaqconcert-ke silteme jasap habarlaidy.
Sheteldik kórermender qazaqstandyq mýzykanttardyń oryndaýynda skripka, violonchel jáne orkestrmen fortepianoǵa arnalǵan Bethovenniń kontsertin tyńdai alady.
Bul halyqaralyq deńgeidegi kontserttiń basty ereksheligi – otandyq ártister álemdik klassikalyq mýzykanyń brendine ainalǵan Berlin simfoniialyq orkestrimen birlesip óner kórsetedi. 73 jyl buryn qurylǵan áigili orkestrmen birlesken kontsert ótkizý – árbir kásibi mýzykalyq ujym úshin úlken mártebe.
«FORTE TRIO» - belgili pianist, Qazaqstannyń eńbek sińirgen qairatkeri Timýr Ýrmancheevtiń bastamasymen qurylǵan erekshe ansambl. Budan buryn fortepiano, skripka men violonchel aspaptary úilesim tapqan mýzykalyq ujymdar elimizde bolmaǵan. Joǵary kásibi sheberliginiń arqasynda «FORTE TRIO» Qazaqstan mádenietin halyqaralyq deńgeide nasihattaityn úzdik kameralyq ansamblge ainaldy.
Parij, Rim jáne Berlin syndy álemdik mádeniet ortalyqtarymen qatar trionyń gastroldik kartasynda Antigýa men Barbýda siiaqty ekzotikalyq memleket bar. Ótken jyldyń jeltoqsan aiynda Qazaqstan Táýelsizdiginiń 30 jyldyǵyna orai trio Frantsiianyń 4 iri qalasynda kontsert ótkizip, osy eldiń 2021 jylǵy kontserttik maýsymyn aiaqtady.
Pandemiialyq shekteýler jaǵdaiynda, sondai-aq qańtardaǵy oqiǵalardyń saldarynan álemdik qaýymdastyq elimizdi saiasi kataklizmder arenasy retinde qabyldanǵan kezeńde trio óz ónerleri arqyly Eýraziialyq keńistiktiń kóshbasshysy bolyp Qazaqstan mádenietiniń joǵary dárejesin kórsetýge umtylady.
