Qazaqstandyq 14 joǵary oqý orny Quacquarelli Symonds World University Rankings halyqaralyq akademiialyq reitingine endi, dep habarlaidy "Ult aqparat" QR Bilim jáne ǵylym ministrliginiń baspasóz qyzmetine silteme jasap.
QS WUR – álemdegi eń bedeldi reitingterdiń biri. Sondai-aq biyl keibir ýniversitetter reitingte birneshe orynǵa kóterilip, óz pozitsiialaryn nyǵaita tústi.
Ál-Farabi atyndaǵy Qazaq ulttyq ýniversiteti taǵy da 175-orynǵa turaqtap, álemniń 200 úzdik ýniversitetiniń qataryna endi. L.N. Gýmilev atyndaǵy Eýraziia ulttyq ýniversiteti 90 pozitsiiaǵa kóterilip 328-oryndy, al Muhtar Áýezov atyndaǵy Ońtústik Qazaqstan ýniversiteti 482-oryndy ielenip, úzdik 500 oqý ornynyń qatarynan kórindi. Sonymen qatar reitingke Satbayev University, Qazaq ulttyq agrarlyq zertteý ýniversiteti, Abai atyndaǵy Qazaq ulttyq pedagogikalyq ýniversiteti, S.J. Asfendiiarov atyndaǵy Qazaq ulttyq meditsina ýniversiteti kirdi.
«Reiting tarihyna kóz júgirtsek, biyl onyń quramyna qazaqstandyq joǵary oqý oryndarynyń rekordtyq sany kirdi. Reitingke engizilgen 14 joǵary oqý ornynyń jeteýi sońǵy jyly óz pozitsiialaryn jaqsarta tústi. Bul qazaqstandyq joǵary bilimniń halyqaralyq deńgeidegi tanymaldylyǵynyń arta túskendigin kórsetedi», – dep atap ótti QR Bilim jáne ǵylym ministrligi Joǵary jáne joǵary oqý ornynan keiingi bilim departamentiniń direktory Ádilet Toibaev.
Joǵary oqý oryndarynyń pozitsiialaryn esepteý kezinde reitingte akademiialyq toptar men jumys berýshi uiym ókilderinen jinalǵan saýalnamalardyń nátijeleri, sondai-aq 2015 jyldan bastap 2019 jylǵa deiingi kezeńdegi 14,7 million jariialanym eskerilgenin atap ótken jón. Álemdik reitingterde ilgerileý – qazaqstandyq bilim berý sapasynyń odan ári jaqsara túsýiniń jáne ýniversitetterdiń joǵary mártebesiniń aiqyn dáleli bolyp tabylady.
