Otandyq 100 kompaniia AliBaba elektrondy saýda alańynda altyn akkaýntqa ie boldy. Bul týraly QR Saýda jáne integratsiia ministrligi eksportty damytý departamentiniń direktory Ómirbek Bashtai málim etti, dep habarlaidy QazAqparat.
«2019 jyly Saýda ministrligi qurylǵannan keiin elimizde «QazTrade» institýty quryldy. Atalǵan institý eksportty ilgeriletý jónindegi ulttyq operator retinde tańdaldy. Ol saraptamalyq bloktan bastap, eksporttyq akseleratsiia, halyqaralyq kórme men is-sharalardy uiymdastyrýdan elektrondyq saýda alańdaryna shyǵarýǵa deiingi qarjylyq emes qoldaý sharalaryn kórsetedi. Iaǵni, osy mindettiń barlyǵy «QazTrade» institýtyna júktelgen», - dedi Ómirbek Bashtai.
Sondai-aq, maman otandyq elektrondyq kommertsiia aiasynda sóz qozǵady. Onyń aitýynsha, qazaqstandyq eksporttaýshylardy AliBaba saýda elektrondyq alańyna shyǵarý quraly bar.
«Memleket biýdjet qarajaty esebinen qazaqstandyq kásiporyndar úshin altyn akkaýnt satyp alady, onyń baǵasy ótken jyly shamamen 3 myń dollar turdy. Akkaýnt qaitarymsyz negizde beriledi. Basty talap kásiporynnyń eksporttyq kelisimsharty bolýy mindetti. Óz kezegimizde eksporttyq kelisimsharty bar otandyq kásiporyndarǵa altyn akkaýnt usynamyz. Onyń artyqshylyǵy nede? Satyp alýshy AliBaba elektrondy alańynan taýar izdegen kezde altyn akkaýnty bar kásiporyndardyń ónimi birinshi bolyp shyǵady. Al jai akkaýnty bar kásiporyndardyń ónimi taýar tizimderiniń sońynda qalýy múmkin. Osy oraida eksporttaýshynyń altyn akkaýnty bolýy mańyzdy ári tiimdi. Atalǵan joba elimizde ótken jyly alǵash ret qolǵa alyndy. 2020 jyldyń qorytyndysy boiynsha 100 otandyq kompaniia AliBaba saýda alańynda altyn akkaýntqa ie boldy. Biyl taǵy 60 kompaniiaǵa kóbeimek. Jalpy AliBaba elektrondy saýda alańynda 4 myńnnan astam qazaqstandyq taýar túri satýǵa qoiylǵan», - deidi ol.
