Elimizde joldardyń 88%-nyń qoldaný jaǵdaiy qanaǵattanarlyq deńgeide. Bul týraly QazAvtoJol ulttyq kompaniiasynyń basqarma tóraǵasy Ulan Álipov málim etti, dep habarlaidy QazAqparat.
«Elimizde jalpy uzaqtyǵy 24 myń shaqyrym jol bar, búginde sonyń 88%-nyń jaǵdaiy qanaǵattanarlyq. Joldardyń sapasyna kelsek, ony tekseretin 5 satydan turatyn óziniń tártibi bar. Atap aitqanda, merdiger, avtor, tehnikalyq qadaǵalaý, sapa ortalyǵy jáne sońynda tapsyrys berýshiniń ózi tekserýden ótkizedi. Sonymen qatar buryn jol sapasynyń kepildik merzimi 2-3 jyl bolsa, endi ol 5 jylǵa deiin uzartyldy. Iaǵni jańadan salynǵan joldan 5 jyl kóleminde aqaý tabylsa, onda merdiger kompaniia óz qaltasynan qaita jóndeidi. Al 5 jyl boiy joldy qaita jóndeý kompaniiaǵa tiimsiz, osy oraida bul talap jaýapkershilikti arttyrady degen úmittemiz», - dedi Ulan Álipov.
Onyń aitýynsha, elimizde joldar jylyna 2 ret tekserýden ótedi.
«Tekserý barysynda joldan aqaý tabylsa, biz onda jaýapty merdiger kompaniiaǵa habarlasyp, kemshilikterdi túzetýǵa ýaqyt beremiz. Eger belgilengen merzimde kemshilik túzetilmese, ol kompaniianyń bizdegi kepildik qarjysy ustalady. Jalpy elimizde respýblikalyq mańyzy bar joldardy salatyn jáne jóndeitin 20-ǵa jýyq kompaniia bar, al óńirlerdiń óz kompaniialary bar. Jolǵa qatysty aityp ótetin taǵy bir másele, biz tek respýblikalyq mańyzy bar joldarǵa jaýaptymyz, al oblys, aýdan jáne aýyl aralyq joldarǵa jergilikti bilik jaýapty», - dedi ol.
Sondai-aq, ulttyq kompaniia basshysy jol salýda sheteldik tájiribeni engizýge qatysty óz pikirin bildirdi.
«Árine, jol salý men jóndeýde sheteldik tájiribege súienemiz. Biraq onyń ózindik erekshelikteri bar. Sebebi Eýropadaǵy joǵary sapaly jol materialdary bizge jaramaidy, óitkeni bizdiń eldiń klimaty bólek. Sondyqtan sheteldik tájiribe bizdiń elge ákelingen jaǵdaidyń ózinde ony arnaiy synaqtan ótkizip, saraptama jasap ózimizdiń aýa raiyna yńǵailap qoldanamyz», - deidi atalǵan uiymnyń basqarma tóraǵasy.
