Qazaqstandyqtarǵa salynyp jatqan «Spýtnik V» vaktsinasy koronavirýstyń mýtatsiialanǵan shtamdaryna qarsy tura alady. Bul týraly onlain brifing barysynda S. Asfendiiarov atyndaǵy Qazaq ulttyq meditsinalyq ýniversitetiniń infektsiialyq jáne tropikalyq aýrýlar kafedrasynyń professory, meditsina ǵylymdarynyń doktory Kúlásh Qurmanova aitty, dep habarlaidy QazAqparat.
«Spýtnik V» jáne qazaqstandyq «QazCovid-in» vaktsinasy - vektorlyq bolyp tabylady jáne adam adenovirýsynyń rekombinantty bólshekteri, olarda koronavirýs qabyqshasynyń S proteini - antideneler bólinetin aqýyz bar. Bul vaktsinalar kez kelgen mýtatsiialanǵan koronavirýs shtammdaryna qarsy tiimdi bolady», - deidi spiker.
Sonymen qatar, ol vaktsina saldyrǵan soń qalyptasatyn immýnitet qansha ýaqytqa deiin jetetinin aitty.
«Vaktsina alǵan soń qalyptasatyn immýnitet kem degende bir jylǵa shydaidy, al keibirinde odanda kóp ýaqytqa barady. Bul adam aǵzasyna bailanysty. Al, viýrs juqtyryp, tabiǵi jolmen qalyptasqan immýnitetke kelsek, ol da aýrý túrine qarai bolady. Máselen, keibirinde syrqat jeńil ótýi múmkin, olardyń immýniteti kóp saqtalmaidy, tipten bolmaýy da múmkin. Sondai-aq syrqat aýyr júrgen kezde naýqastyń immýndyq júiesin álsiretip jiberedi, olarda da virýsqa qarsy immýnitet qalyptaspai qalady. Sondyqtan vaktsina alǵan durys», - deidi Kúlásh Qurmanova.
Maman koronavirýspen aýyrǵan adamdar ońaltýdy qajet etetinin jetkizdi.
«Epidemiologtar men ártúrli mamandyqtaǵy dárigerlerdiń, atap aitqanda infektsionister, nefrologtar, endokrinologtar, nevrologtar pikirimen kelisemin. Koronavirýs infektsiiasy ishki organdardy, ásirese mi, júrek, búirek, baýyr jáne taǵy basqa aǵzany zaqymdaidy, onyń saldary ár adamda aýrýǵa deiingi densaýlyq jaǵdaiyna, infektsiialyq protsestiń aýyrlyǵyna bailanysty ár túrli kórinedi. Sondyqtan ár naýqastyń jaǵdaiyna jeke qaraý qajet. Jalpy, fizikalyq turǵyda belsendilik, durys tamaqtaný, tolyq uiqy, jaman ádetterden bas tartý munyń bári immýnitetti kóteredi», - deidi professor.
