Qazaqstan salyq tóleýshiler qaýymdastyǵy basqarý keńesiniń tóraiymy Janat Ertilesova elimizdegi naryq pen salyq jeńildikteri týraly pikir bildirdi, dep habarlaidy QazAqparat.
«EDYU elderinde tabiǵi monopoliialar degen uǵym joq. Damyǵan elderdiń zańnamasynda mundai uǵym joq, tek retteletin naryqtar bar. Al Qazaqstanda monopoliialar uǵymy áli sovettik standarttar boiynsha retteledi. Munyń barlyǵyna biznes pen sheneýnikter resýrs jumsaidy. Barlyǵy saraptaýǵa kelmeitin tonnalaǵan qaǵaz toltyrady. Memlekettik organdarda ekonomikalyq saraptama uǵymy joq. Al damyǵan elderde sotta da ekonomikalyq saraptama qabyldanady. Mundai zamanaýi tásilderdi engizýdi sheneýnikterdiń ózderi qunttamai otyr. Monopoliiaǵa qarsy komitet júrgizgen taldaýlardyń barlyǵy baǵa tym joǵary, alypsatarlardy joiý kerek degenge saiady. Bulai bolmaidy, bárin naryqtyń ózi retteýi kerek. Eń bastysy - báseke bolýy kerek», - dedi Janat Ertilesova Prezidenttiń Qazaqstan halqyna Joldaýynyń alǵashqy nátijeleri týraly ǵylymi-praktikalyq konferentsiiada.
Sonymen birge, sarapshy salyqtyq saiasat pen ákimshiliktendirý salasyna da toqtaldy.
«EDYU elderinde JIÓ-ge salyqtyq túsimder úlesi Qazaqstanmen salystyrǵanda eki ese kóp. Bul bizde salyq quny tómen degen sóz emes, bizde kóleńkeli sektordyń úlesi kóp. Bári salyqshylardy jazǵyrady. Prezident Joldaýynda salyq boiynsha jaqsy baǵyttar bar. Solardyń bári túpki nátijege deiin atqarylsa jaqsy bolatyn edi. Bul salyq deklaratsiiasy men ózin-ózi jumyspen qamtyǵandarǵa qatysty. Elimizde salyq jeńildikterine ekonomikalyq baǵalaý júrgizilmedi. Al búkil salyq kodeksi - jeńildikter. Menińshe, olardyń tiimdiligin baǵalaý qajet», - dedi spiker.
Úshinshiden, shaǵyn jáne orta biznesti aitqanda, únemi shaǵyn bizneske kóp kóńil bólinetinin aitty.
«Orta biznes - elimizdiń turaqty damýynyń negizi. Bul eń ózgermeli biznes. Biraq, Salyq kodeksinde de, Biznestiń jol kartasynda da orta bizneske jeńildik qarastyrylmaǵan. Statistika boiynsha, elimizde orta biznes sýbektileri azaiyp keledi», - dedi Janat Ertilesova.
Aita keteiik, elordada Prezident Qasym-Jomart Toqaevtyń Qazaqstan halqyna Joldaýynyń alǵashqy nátijeleri talqylandy. Oǵan memlekettik organdardyń, Qazaqstannyń ǵylymi-saraptamalyq qaýymdastyǵynyń 80-nen astam ókili qatysty.
