QR IIM Tótenshe jaǵdailar komiteti júrgizgen aýqymdy tekserýdiń nátijesinde 1 aptanyń ishinde 75 nysan tekserilip, onyń tek úsheýinen ǵana tártip buzýshylyq anyqtalmaǵan. Bul týraly búgin Astanada ótken baspasóz máslihatynda atalmysh vedomstvonyń tóraǵasy general-maior Vladimir Bekker málim etti, dep habarlaidy «QazAqparat» tilshisi.
«Elimizdegi oiyn-saýyq ortalyqtary men iri saýda dúkenderin bir aptadaǵy tekserisi boiynsha aldyn ala aqparatty usynamyz. Premer-Ministrdiń tapsyrmasy negizinde barlyq iri oiyn-saýyq ortalyqtaryn aýqymdy túrde tekserý jumystary bastalyp ketken bolatyn. Ótken aptanyń dúisenbisinde 207 tekseris jumysy bastalsa, qazirgi deiin (6 sáýirdegi jaǵdai boiynsha) 308 tekserý júrgizildi. Iaǵni, bir aptanyń ishinde 75 nysandy tekserý jumysy aiaqtaldy. Tekserilgen nysandarda 1 myńnan astam buzýshylyq (1037) anyqtaldy. Buzýshylyqtar tek 3 nysanda anyqtalǵan joq. Olar: Qaraǵandy oblysynyń Shahtinsk qalasyndaǵy 2 bazar jáne Qostanai oblysynyń Qarabalyq aýdanyndaǵy «Deliýks» SO», - deidi Bekker.
Komitet tóraǵasynyń aitýyna qaraǵanda, tekseris qortyndysy boiynsha 72 zańdy jáne jeke tulǵa ákimshilik jaýapkershilikke tartylǵan.
«Jalpy alǵanda oiyn-saýyq nysandarynan buzýshylyqtardyń barlyq túrleri anyqtaldy. Bul - evakýatsiialyq shyǵý esiginiń jabyq bolýy, órt dabyl belgisiniń jumys istemeýi, avtomatty túrde órt sóndirý júiesiniń jumys istemeýi, evakýatsiia joldarynyń qoqysqa tolyp qalýy, evakýatsiia jolyna arnalǵan orynda saýda núkteleriniń ornalastyrylýy jáne taǵy basqalar. Demek, belgili bir nysandaǵy buzýshylyqtardyń sany 3-ten 30-ǵa deiin jetip otyr», - deidi ol.
Jaǵdaidy baqylap, shynaiy tekseristi qamtamasyz etý úshin TJK kelesi qadamǵa baryp otyr. Iaǵni komitet saitynda «Munda qaýipsiz emes» atty rýbrika ornalastyrylǵan. Barlyq tekserý qujattary atalmysh rýbrikada jariialanatyn bolady.
Tekseris nátijesinde salynǵan aiyppuldyń jalpy mólsheri 1 million 193 myń teńgeni quraǵan.
