QR Densaýlyq saqtaý ministrligi Qoǵamdyq densaýlyq saqtaý komitetiniń zerthanalary teksergen azyq-túlik ónimderiniń shamamen 20 protsentinen shoshqa DNQ-lary tabylǵan. Málimetter ónimniń qaptamasynda kórsetilmegen.
Bul týraly «QazAqparat» agenttiginiń resmi saýalyna jaýap bergen QR Bas memlekettik sanitarlyq dárigeri Jandarbek Bekshin aitqan.
«2018 jyldyń alǵashqy eki aiynda janýar tinderiniń sáikestigin anyqtaý boiynsha 147 azyq-túlik ónimderiniń synamasy zerttelip, 757 zertteý júrgizildi. Onyń ishinde 27 synamadan (nemese 19%) ónim qaptamasynda kórsetilmegen shoshqa DNQ-sy tabylǵan», - dep túsindiredi Jandarbek Bekshin.
Onyń aitýynsha, komitet zerthanalary shoshqa, iri qara mal, taýyq nemese jylqy DNQ-synyń ǵana emes, it, mysyq, býivol, eshki jáne qoi tinderiniń de sáikestigin teksere alatyn áleýetke ie.
Komitettiń habarlaýynsha, azyq-túlik ónimderiniń qaýipsizigin baqylaý satylymǵa shyǵarylǵan ónimderdi satyp alý jolymen júrgiziledi. Kedendik odaqtyń tehnikalyq tártipteri talaptarynyń sáikestigine sanitarlyq-epidemiologiialyq saraptamalar júrgizilýde.
