Qazaqstandyq kolledjderge qujattardy qabyldaý 25 maýsymda bastalady, biylǵy oqý jylyna 97 myń grant bólindi, dep habarlaidy QazAqparat.
Qabyldaý rásimi jańa erejeler boiynsha júrgiziledi jáne tegin bilim alǵysy keletinder úshin kvotalar tizimi keńeitildi. Bul jańashyldyqtar týraly QR BǴM Tehnikalyq jáne kásiptik bilim departamentiniń direktory Nasymjan Ospanova aityp berdi.
«Biyl pedagogikalyq, meditsinalyq jáne shyǵarmashylyq mamandyqtardy qospaǵanda, qabyldaý emtihandary bolmaidy. Konkýrs attestattaǵy mindetti jáne beiindik pánderdiń ortasha baly boiynsha ótkiziledi. Odan basqa, bilim berýdiń ashyqtyǵy men qoljetimdiligin qamtamasyz etý úshin QR BǴM «aqsha stýdentpen birge júredi» qaǵidaty negizinde granttardy bólýdiń jańa tetigin ázirledi. Iaǵni, buryn granttar kolledjder arasynda bólingen bolsa, endi olar talapkerlerdiń tańdaýy boiynsha beriledi. Memlekettik tapsyrys talapkerlerdiń tańdaýy boiynsha kolledjder arasynda ornalastyrylmaq», - deidi N. Ospanova vedomstvonyń Facebook-tegi paraqshasynda.
Tehnikalyq jáne kásiptik bilim berý uiymdaryna qabyldaý 25 maýsymnan bastalady. Talapkerler kolledjge qujattardy eki tásilmen – elektrondyq úkimet portaly Egov.kz arqyly nemese tikelei kolledjge tapsyra alady.
Bolashaq stýdentterdiń 4 mamandyq pen 4 kolledjge deiin tańdaý quqyǵy bar. Konkýrs attestattaǵy mindetti jáne beiindik pánderden qoiylǵan baǵanyń ortasha konkýrstyq baly boiynsha aqparattyq júie arqyly ótkiziledi. Pedagogikalyq, meditsinalyq jáne shyǵarmashylyq mamandyqtarda oqyǵysy keletin túlekter arnaiy nemese shyǵarmashylyq emtihandar tapsyryp, suhbattasýdan ótedi. Arnaiy nemese shyǵarmashylyq emtihandardy kolledjder janynan qurylǵan komissiialar júrgizedi.
«Konkýrs 2 kezeńge bólingen. Birinshi 9-synyp negizinde oqýǵa túsetin talapkerler arasynda memlekettik tapsyrysty bólý 19-22 tamyz aralyǵynda, al, 11 synyp túlekteri úshin – 22-25 tamyz aralyǵynda ótedi. Igerilmegen oryndar bolǵan jaǵdaida bilim grantymen qamtylmaǵan talapkerler arasynda memlekettik bilim berý tapsyrysyn qaita bólý júrgiziledi. Memlekettik tapsyrys boiynsha oqýǵa qabyldaý týraly aqparat talapkerdiń jeke kabinetine keledi. Kolledjderge qabyldaý 31 tamyzda aiaqtalady», – dep atap ótti QR BǴM Tehnikalyq jáne kásiptik bilim departamentiniń direktory Nasymjan Ospanova.
Bilim ministrliginiń habarlaýynsha, elimizde 795 kolledj jumys isteidi. Onyń 454-i – memlekettik oqý oryndary. Granttardy 435 memlekettik kolledj jáne 170 jeke menshik kolledj alady. 2021-2022 oqý jylyna memlekettik bilim berý tapsyrysy 10 baǵyt jáne 200-den astam suranysqa ie mamandyqtar boiynsha 97 myń orynǵa bólindi.
«Biyl kvotalyq sanattar tizimi keńeitildi, endi kvotalar 9 sanat boiynsha qarastyrylady. Kóp balaly otbasylardan shyqqan balalar úshin 5%, mártebesi keminde úsh jyl tolyq emes otbasy balalaryna 1%, bala kezinen múgedek balalardy tárbielep otyrǵan otbasylardan shyqqan talapkerler men birinshi jáne ekinshi toptaǵy múgedekter úshin 1% kvota qosyldy. Baldar teń bolǵan jaǵdaida kvotalyq sanat jáne attestattyń ortasha baly eskeriledi», – dep atap ótti Nasymjan Ospanova.
Sonymen birge, biyl alǵash ret barlyq túlekterge bilim basqarmalarynyń aqparattyq júieleri arqyly kásibi diagnostikadan ótý múmkindigi beriledi. Diagnostika túlekterge mamandyq tańdaýda kómektesýge arnalǵan jáne usynymdyq sipatqa ie.
