QR Indýstriia jáne infraqurylymdyq damý ministrligi «Qazaqstan Respýblikasynyń keibir zańnamalyq aktilerine kólik máseleleri boiynsha ózgerister men tolyqtyrýlar engizý týraly» zań jobasyn ázirlep, Úkimettiń qaraýyna engizdi, dep habarlaidy "Ult aqparat".
Zańnamaǵa engizilgen ózgerister kelesi mindetterdi sheshedi:
- kóliktik baqylaý júiesinde adam faktory men sybailas jemqorlyq táýekelderin joiý;
- avtojoldardyń saqtalýyn arttyrý, ákimshilik kedergilerdi azaitý;
- Qazaqstan Respýblikasynyń aýmaǵy boiynsha iri kólemdi jáne aýyr salmaqty avtokólik quralynyń júrip ótkeni úshin jinalatyn alymdar esebinen respýblikalyq biýdjet kirisin ulǵaitý;
- Kaspii teńiziniń qazaqstandyq sektorynda sýǵa batqan sheteldik kemelerdi kóterýdiń quqyqtyq tetikterin belgileý;
- temirjol kóligindegi apattardy, sondai-aq kemelerde bolatyn apattyq jaǵdailardy tergeýdiń qoldanystaǵy tetikterin jetildirý;
- ushý qaýipsizdigi men áýedegi qaýipsizdikti arttyrý;
- azamattyq aviatsiianyń tranzittik áleýetin nyǵaitý jáne Qazaqstannyń aviatsiialyq bilik oryndarynyń ókilettikterin kúsheitý jáne bedelin arttyrý;
- jalpy kólik salasyndaǵy zańnamany jetildirý.
Zań jobasynda:
- azamattyq aviatsiia salasyndaǵy ýákiletti uiymdy institýtsionaldyq damytý arqyly azamattyq aviatsiia salasyndaǵy memlekettik retteýdiń tiimdiligin arttyrý;
- teńiz apattarynyń saldaryn joiýǵa bailanysty qatynastardy retteý, sondai-aq batyp ketken keme men múliktiń ornalasqan jerin, belgileýin jáne joiylýyn anyqtaý úshin qarjylyq qamtamasyz etýdi belgileý;
- kemelermen bolǵan apattyq jaǵdailardy, sondai-aq temirjol kóligindegi apattardy, apattar men oqiǵalardy, onyń ishinde jolaýshylar poiyzynda vagondardyń shyǵyp ketýine ákep soqqan tergeýdiń jedeldigin qamtamasyz etý qarastyrylǵan.
«Bul sharalardy iske asyrý respýblikalyq biýdjet esebinen qosymsha qarjy shyǵynyn talap etpeidi, sondai-aq teris áleýmettik-ekonomikalyq, quqyqtyq jáne ekologiialyq saldary bolmaidy», - delingen QR Indýstriia jáne infraqurylymdyq damý ministrligi málimetinde.
