Resei Federatsiiasyndaǵy «Komsomolskaia pravda» gazetiniń saitynda Qazaqstandaǵy qańtar tragediiasy týraly kólemdi suhbat shyqty, dep habarlaidy QazAqparat.
«Komsomolskaia pravda» gazeti suhbat berýshi Vladislav Inozemtsevti saiasatker, ekonomika ǵylymdarynyń doktory, áleýmettanýshy dep tanystyrǵan. Sarapshy elimizde bolǵan dúmpýdi qazir «Aziia jolbarystary» atalyp júrgen elderdiń basyndaǵy ótpeli kezeńdermen salystyrady.
«Qazaqstan 2010 jyldardyń ortasyna deiin postkeńestik elderdiń ishindegi eń tabysty melekettiń biri boldy. Reseiden basty aiyrmashylyǵy – shetelden investitsiia tartý baǵytynda ózin ashyq etip kórsetti. Resei 2016 jylǵa taman ǵana sovet kezindegi munai óndirisiniń kólemine qol jetkizse, Qazaqstanda bul kezde munai óndirisiniń kólemi 1990 jylǵy kórsetkishinen 3,6 ese, gaz óndirisi boiynsha 6 ese, ýran óndirisi boiynsha 14 ese alǵa ketip qalǵan bolatyn. Onyń ústine qazaqtar innovatsiiamen áýestene bastady. Reseide D.Medvedev halyqaralyq qarjy ortalyǵyn qurý kerek dep júrgen kezde Qazaqstan sondai ortalyqta quryp ta qoiǵan edi. Ol ortalyq aǵylshyn quqyǵynyń negizinde jumys isteidi», - dep eske alady reseilik maman.
Sondai-aq, ol Ońtústik Koreia, Indnoneziia, Taivan, Malaiziia siiaqty elderdiń basynan da osyǵan uqsas kezeńder ótkenin aitady.
«Biraq ortalyqtandyrylǵan bilik jemqorlyq pen áýlet ainalasyna toptasý siiaqty jaǵymsyz qubylys týǵyzatyny bar. Ońtústik Koreiada, Taivanda, Indoneziiada, eleýsiz dárejede bolsa da Malaiziiada indýstrialdaný, jańǵyrý jyldam júrdi. Ol qarqyndy ustap turý úshin qarajatty da aiamai quiyp otyrý kerek edi. Mundai jaǵdaida qarapaiym halyq utady dep aitýǵa kelmeidi. Al Qazaqstannyń jaǵdaiynda áýelde jyldam bastalǵan damý qarqyny kenet báseńdedi. Bul adamdardyń narazylyǵyn týǵyzdy. Qazaqstanda qańtardyń basynda bolǵan oqiǵalar osyndai jaittardan týyndady dep oilaimyn», - deidi ekonomist.
Aitýynsha, Qazaqstannyń basyndaǵy jaǵdai Indoneziiadaǵy aýyr kezeńge kóbirek uqsaidy.
«1998 jyly Indoneziiada da osylai bolǵan. Ekonomikalyq problemalardyń saldarynan eldi 30 jyl basqarǵan Sýharto bilikten qulady. Al Ońtústik Koreiada 1979-80 jyldary halyqtyń tolqýy avtoritarlyq júieni ydyratyp, jańa basshyny bilikke ákeldi. Ol basshy elin salystyrmaly túrde demokratiialandyrdy. Qazaqstanda osyǵan uqsas oqiǵanyń órbýine sátsiz bilik tranziti túrtki boldy», - deidi Vladislav Inozemtsev.
