«Atameken» ulttyq kásipkerler palatasynyń basqarma tóraǵasy Abylai Myrzahmetovtyń aitýynsha, bul ózgeris otandyq taýar óndirýshilerge múmkindik týǵyzyp otyr, dep habarlaidy QazAqparat.
«Árbir transulttyq kompaniianyń ekologiia men shetelden jumys kúshin tartýdaǵy mindetinen bólek, ózindik áleýmettik mindettemeleri bar. Bul rette BAQ quraldary myna jańalyqty baiqamai qaldy: «Teńizshevroil» jaqynda tuńǵysh ret taýardy satyp alý josparyn jariialady. Bireýge bul ózgeris esh jańalyq bolmaýy múmkin. Biraq bul salada birneshe jyl júrgen men úshin bul - aitarlyqtai mańyzdy aqparat. Sol sekildi taǵy bir iri kompaniia satyp alý josparyn jasaýǵa daiyn ekenin aityp, otandyq taýarlardyń reestrin surady. Sondyqtan bul jumys kúsheitiledi», - dedi Abylai Myrzahmetov OKQ-da ótken baspasóz máslihatynda.
Onyń aitýynsha, qytailyq jer qoinaýyn paidalanýshylarmen de bul baǵytta jumys júrgiziledi. Abylai Myrzahmetovtyń sózine sensek, jer qoinaýyn paidalanýshylarmen jumysta Energetika ministrliginde yqpal eterlik tetikter barshylyq.
«Shetelden jumys kúshin tartýdan bólek, osyndai máselelerge de (iri kompaniialarǵa otandyq taýarlardy ótkizý) nazar aýdaryp, qoǵam bolyp yqpal etýimiz kerek. Otandyq taýardyń baǵasy men sapasy laiyq pa – endeshe satyp alyńyzdar, bolmasa Qanat Bozymbaev aitqandai, litsenziiany qaitaryp alýǵa deiingi sharany qabyldaǵan jón. «Kaztsink», «Qazaqmys», «Arselor»... «Arselor Mittal» eshqashan otandyq ónimdi satyp almaidy. Jaýapkershilik degen atymen joq. «Qazaqmys» qajettiliktiń 50 paiyzyn alyp otyr. «ERG» kompaniiasy da seriktestikke daiyn. Eger biz oily protektsiiany qolǵa almasaq, otandyq taýardy ósirmek túgili, qoldaǵy barymyzdan aiyrylyp qalýymyz múmkin. Importty almastyrý degen sóz qozǵalǵanda eń aldymen óz elimizdiń, óz taýar óndirýshilerimizdiń múddesi týraly aitamyz. Sol sebepti batyl qadamdardan qoryqpaý kerek», - dedi Abylai Myrzahmetov.
Eske sala ketsek, elimizde «Atameken» Ulttyq kásipkerler palatasy janynan importty almastyrý jónindegi keńes qurylady. Keńes alańynda biznes-qoǵamdastyq ýákiletti memlekettik organdarmen, uiymdarmen birlesip, jergilikti qamtýdy jáne retteletin satyp alý júiesin, kedendik-tariftik saiasatty, tehnikalyq retteý, shikizat bazasyn damytý, infraqurylymdyq damý, memlekettik qoldaý sharalarynyń tiimdiligin arttyrý, ónerkásiptik kooperatsiiany damytý, sondai-aq óńdeý ónerkásibi damýyna bailanysty basqa máselelerdi talqylaidy.
