Foto: ashyq derekkóz
Búgin biz Qarjy ministri Mádi Tákievtiń baiandamasy negizinde Mindetti áleýmettik saqtandyrý qorynyń qarjysy qalai tiimsiz jumsalyp, qalai jymqyrylǵany týraly birneshe mysal aitqan edik. Sondai mysaldardyń biri – bir naýqastyń atyna kóp dári jazý, dep habarlaidy Ult.kz Azattyq Rýhy saityna silteme jasap.
Jalpy, Mádi Tákiev úkimettegi keńeste málim etkendei, aimaq-aimaqtaǵy emhanalar men aýrýhanalar naýqastardyń atyna shekten tys kóp dári jazǵan. Bul – qarjyny tiimsiz jumsaýdyń bir amaly bolǵan kórinedi.
«Jetisý oblysynyń dárigerleri eki balaǵa 126 myń «Dimeksid» gelin jazyp, qujat júzinde satqan. Sonda bir bala jylyna 63 myń gel alǵan», - deidi Tákiev.
Budan ózge, Qarjy ministriniń sózine sensek, Qazaqstandaǵy taǵy bir óńirdiń aýrýhanasy qujat júzinde bir naýqasqa bir táýlik ishinde 2 872 dári bergen. Balalar aýrýhanasynda da osyǵan uqsas 179 fakt tirkelgen eken. Iaǵni, 88 myń túrli dári-dármek osylai esepten shyqqan. Bul dárini «qabyldaǵan» naýqastar statsionarlarda bir-aq kún jatqan.
