Foto: lubimec.kz
Elimizdegi balalar hirýrgiiasynyń negizin qalaýshy, akademik, Memlekettik syilyqtyń laýreaty Kamal Ormantaev 88 jasqa qaraǵan shaǵynda ómirden ozdy. Bul týraly S.J.Asfendiiarov atyndaǵy Qazaq ulttyq meditsina ýniversitetiniń baspasóz qyzmeti habarlady.
Qazaqstannyń balalar hirýrgiiasy, pediatriia, travmatologiia men anesteziologiiasynyń negizin qalaýshy Kamal Ormantaev 1936 jyly 11 qyrkúiekte Qyzylorda oblysynyń Qarmaqshy aýdanynda dúniege kelgen.
Joǵary bilikti balalar hirýrgi Kamal Ormantaev kókirek qýysy, ókpe, óńesh, qursau qýysy, bas súiek pen búirek múshelerine jiyrma tórt myńǵa jýyq kúrdeli ota jasaǵan.
Kamal Ormantaev 1953 jyly Almaty memlekettik meditsina institýtynyń pediatriia fakýltetine túsedi. 1959 jyly Almaty memlekettik meditsina institýtynyń balalar hirýrgiiasy kafedrasynyń klinikalyq ordinatýraǵa túsip, 1961 jyly klinikalyq ordinatýrany jáne 1965 jyly kandidattyq dissertatsiiany qorǵap gospitaldik hirýrgiia kafedrasynyń aspirantýrasyn támamdaidy. Sodan soń Kamal Sárýaruly joǵary oqý ornynda balalar hirýrgiiasy kafedrasynyń assistenti bolyp eńbek jolyn bastaidy.
1971 jyly KSRO MǴA Pediatriia Ǵylymi-zertteý institýtynda doktorantýrany bitirgennen soń doktorlyq dissertatsiiany qorǵap, oǵan professor ataǵy berildi.
1968 jyldan bastap 2012 jylǵa deiin Kamal Sárýaruly Ormantaev balalar hirýrgiiasy kafedrasyn basqardy. Kafedrany basqarǵan 43 jyldyń ishinde bilikti ustazdyń qolynan 1500-nan astam dáriger bolashaqqa joldama alyp, kóbisi oblysaralyq balalar hirýrgiiasy boiynsha ulttyq ortalyqtardyń jetekshileri, kafedra meńgerýshileri atandy. Akademik Kamal Ormantaev joǵary bilikti mamandar daiyndaýda hirýrgtardyń kásibi jan-jaqty damýyn, ǵylymnyń damýyna jáne onyń halyqaralyq deńgeige kóterilýine úlken kóńil bóldi.
Kamal Ormantaev 320-dan asa ǵylymi jumystardyń, balalar hirýrgiiasy boiynsha keńestik nusqaýlardaǵy 9 taraýdyń jáne 9 monografiianyǵ avtory.
Dáriger II dárejeli «Dostyq», III dárejeli «Barys» jáne «Parasat» ordenderimen marapattalǵan.
