Aǵa leitenant Ardana Botai Sý-30SM kópfýnktsionaldy joiǵyshynyń ekipaj komandiri retinde alǵashqy jeke ushýyn oryndady, dep habarlaidy QR QM baspasóz qyzmeti.
QR QK Áýe qorǵanysy kúshteriniń bas qolbasshysy aviatsiia general-leitenanty Nurlan Ormanbetov derbes ushýǵa ruqsat beretin praktikalyq emtihandy qabyldady.
- Qazaqstan Respýblikasy Qarýly Kúshteriniń tarihynda Sý-30SM jaýyngerlik ushaǵynda ekipaj komandiri retinde derbes ushýdy alǵash ret áiel adam oryndady. Onyń buǵan jaqsy daiyndalǵanyn, kók aspandy baǵyndyrýǵa degen umtylysyn, joiǵysh ushqysh retinde memleketimizdiń áýe shebin kúzetýdegi mindetterdi oryndap júrgenin atap ótken jón. Ol jaýyngerlik aviatsiiadaǵy áielderdiń erlermen teń dárejede kúrdeli mindetterdi oryndai alatynyn dáleldedi, - dedi aviatsiia general-leitenanty Nurlan Ormanbetov.
Qazaqstandaǵy áskeri aviatsiianyń jalǵyz áiel ushqyshy Qaraǵandy aviabazasynda qyzmet etedi. Birneshe ai boiy Ardana Taldyqorǵan qalasyndaǵy aviatsiia bazasynda arnaiy oqýdan ótti.
- Sý-30SM ushaǵymen jeke ushý men úshin kásibi turǵyda qalyptasýǵa jasaǵan úlken qadam. Aldaǵy maqsatym tehnikany jaqsartý jáne jer ústindegi, áýedegi maqsattarǵa jáne toptyq ushýlarǵa jaýyngerlik qoldanýǵa ruqsat alý úshin ári qarai daiarlyq baǵdarlamasyna mashyqtaný daǵdylaryn pysyqtaý, - dep Ardana Botai bolashaqqa arnalǵan josparlarymen bólisti.
Atalǵan Sý-30SM – kópfýnktsionaldy 4++ býyndy joiǵysh ushaq. Ol kez-kelgen aýa-raiy jaǵdaiynda, kúndiz-túni áreket etýge qabiletti. Áýe barlaýyn júrgizýge, áýede, jer ústinde jáne teńizde nysandardy joiýǵa arnalǵan.
Joǵary manevrli joiǵysh ushaqpen ushýǵa ruqsat alý úshin birneshe ai boiy teoriialyq bilim alyp, arnaiy Sý-30SM trenajerynda jattyǵady, shtýrman retinde ushady. Kóptegen synaqtar men emtihandardy sátti tapsyrǵan soń ǵana, táýelsiz ushýǵa ruqsat alady.
