Qazaqstanda árbir ekinshi azamat aqparatty internetten alady. Bul týraly búgin elordada ótken qazaqtildi onlain-kontent jasaýshylardyń forýmynda aityldy, dep habarlaidy QazAqparat.
«Internews Kazakhstan» «Ortalyq Aziia elinde - Qazaqstan, Ózbekstan jáne Tájikstanda adamdar aqparatty qalai tutynady? Aqparat kózin qaidan alady?» degen suraqqa jaýap izdedi. Saýalnama qorytyndysy boiynsha, tutastai alǵan kezde úsh elde de aqparat alý kózi retinde aldyńǵy orynda teledidar tur. Ekinshi orynda – internet. Qazaqstanda saýalnamaǵa qatysqan árbir ekinshi adam jańalyqty internetten qaraitynyn aitqan. Úshinshi orynda áleýmettik jeli, týǵan-týys, dos-jaran tur. Radio Tájikstanda ǵana oq boiy alda tur», - deidi aimaqtyq media-keńesshi Ashat Erkimbai.
Sondai-aq, ol Ortalyq Aziia halqy internettegi ýaqytyn qalai ótkizetinin aitty.
«Ortalyq Aziiadaǵy turǵyndar internetti eń aldymen, kóńil kóterý, jańalyq oqý, odan keiin film qaraý maqsatynda qoldanady. Aziianyń ózge elderimen salystyrǵanda Qazaqstanda internet arqyly tólem jasaý, bank qyzmetin paidalaný, elektrondy taýar satyp alý júiesi jolǵa qoiylǵan. Iaǵni, bizdiń aýditoriia elektrondy dúnieni satýǵa, satyp alýǵa daiyn jáne oǵan mashyqtanǵan. Sondai-aq, saýalnamaǵa qatysýshylar onlain-kontent satyp alýǵa 2-3 myń teńgesin qiiatyny týraly jaýap bergen. Sonymen qatar, áleýmettik-demografiialyq saýalnama qorytyndysy boiynsha, qazaq tilinde kontentti tutynatyn adamdar sany artyp bara jatqany baiqalady», - deidi ol.
