«Barys» jáne Qazaqstan ulttyq quramasynyń qorǵaýshysy Darren Dits ekinshi jyl qatarynan eldiń úzdik hokkeishisi retinde tanyldy, dep habarlaidy sports.kz portaly.
«Qazaqstannyń úzdik hokkeishisi» baiqaýynyń direktoraty kesh bolsa da, 2019/2020 jylǵy maýsym laýreaty anyqtalatyn dástúrli referendýmnyń qorytyndysyn shyǵardy.
Burynǵy dástúr boiynsha, hokkei týraly jazatyn jáne teledidarda hokkei taqyrybyn júrgizetin tilshilerge olardyń kózqarasy boiynsha ótken maýsymda ózderin erekshe tanytqan oiynshylar «úshtigin» ataý usynylǵan. Bul rette jyl hokkeishisi ataǵyna tek qazaqstandyq sportshylar ǵana emes, otandyq klýbtarda oinaǵan legionerler de qatysty. Birinshi oryn úshin anketada úsh upai, ekinshi oryn úshin eki jáne úshinshi orynǵa – bir upaidan eseptelgen.
Eldiń úzdik hokkeishisin anyqtaý maqsatynda júrgizilgen suraý 29-shy ret ótkizildi. Buǵan deiin hokkei maýsymynyń laýreattary arasynda Evgenii Koreshkov (úsh márte - 1994, 2003, 2006 jj.), Vitalii Eremeev (eki márte 2011, 2012 jj.) jáne Roman Starchenko (eki márte 2013, 2015 jj.), jáne Igor Zemlianoi (1992 j.), Konstantin Shafranov (1993 j.), Andrei Pcheliakov (1995 j.), Andrei Samohvalov (1996 j.), Vladimir Zavialov (1997 j.), Aleksandr Koreshkov (1998 j.), Dmitrii Ýpper (1999 j.), Fedor Polishýk (2000 j.), Vitalii Tregýbov (2001 j.), Sergei Aleksandrov (2002 j.), Anatolii Filatov (2004 j.), Vitalii Kolesnik (2005 j.), Talǵat Jailaýov (2007 j.), Andrei Gavrilin (2008 j.), Kevin Dallmen (2009 j.), Dmitrii Dýdarev (2010 j.), Brendon Bochenski (2014 j.), Roman Savchenko (2016 j.), Nikita Mihailis (2017 j.), Evgenii Rymarev (2018 j.) jáne Darren Ditts (2019 j.) bolǵan.
Maýsymnyń úzdik hokkeishisin anyqtaityn tilshiler referendýmynda Kanadanyń (Medisin-Het) 27 jastaǵy týmasy Darren Ditts ekinshi jyl qatarynan jeńiske jetti. Sportshy ótken jyly Qazaqstan azamattyǵyn aldy.
Suraý qorytyndysy boiynsha, segiz sholýshy qorǵaýshyny birinshi orynǵa qoisa, jeteýi ekinshi orynǵa jáne taǵy bireýi – úshinshi orynǵa qoiǵan. Somaǵa shaqqan kezde, bul jeńiske jetkizgen 39 upai ákeldi.
Baiqaýda ekinshi oryndy 28 upai jinaǵan golkiper Eddi Paskýale aldy. Úshinshi orynda – baiqaýdyń úshinshi júldegeri Nikita Mihailis (27 upai). Úzdikter «bestiginde» sondai-aq «Barys» ardageri Roman Starchenko (10 upai) jáne «Torpedoda» maýsymdy jaqsy ótkizgen shabýyldaýshy Evgenii Rymarev (8 upai) bar. Saýalnamada úsh klýbta oinaityn 16 sportshynyń esimi atalǵan. Olardyń kóbi – «Barys» hokkeishileri.
