Elde tótenshe jaǵdaidyń jariialanýyna bailanysty jyldyq deklaratsiialardy tapsyrý merzimi uzartyldy. Bul týraly QR Qarjy ministrligi Memlekettik kirister komitetinen málim boldy, dep habarlaidy "Ult aqparat".
«Elimizde tótenshe jaǵdaidyń engizilýine bailanysty zańdy jáne jeke tulǵalarǵa deklaratsiia tapsyrý merzimi tótenshe jaǵdaidyń ýaqytyna sáikes kelgendikten, ol 30 kúntizbelik kúnge, iaǵni 2020 jyldyń 30 sáýirine deiin uzartylady. Alaida, ol úshin salyq eseptiligi nysandaryn elektrondy túrde tapsyrý qajet. Osylaisha, 2020 jyldyń 30 sáýirine deiin tapsyrylǵan elektrondy deklaratsiialar ýaqytynda tapsyrylǵan bolyp sanalady», - delingen habarlamada.
Bul uzartýlar kelesi salyq eseptiliginiń nysandaryna qatysty qoldanylady:
1) korporativtik tabys salyǵy boiynsha deklaratsiia (100.00, 110.00, 150.00, 180.00 nysandar);
2) jeke tabys salyǵy boiynsha deklaratsiia (220.00, 240.00 nysandar);
3) jeke tabys salyǵy jáne múlik boiynsha deklaratsiia (230.00 nysan);
4) kólik quraldary salyǵy, jer salyǵy jáne múlik salyǵy boiynsha deklaratsiia (700.00 nysan);
5) qorshaǵan ortaǵa emissiia úshin tólemaqy boiynsha deklaratsiia (870.00 nysan);
6) jalǵa berý (paidalaný) sharttarynyń tizilimi (871.00 nysan);
7) tirkelgen shegerim paidalanylatyn arnaýly salyq rejimin qoldanatyn salyq tóleýshiler úshin deklaratsiia (912.00 nysan);
8) biryńǵai jer salyǵyn tóleýshilerge arnalǵan deklaratsiia (920.00 nysan).
